📔 भातशेतीच्या पाहणीसाठी पालकमंत्री नितेश राणे मैदानात!

सिंधुदुर्ग दौऱ्यात विविध तालुक्यांचा घेणार पालकमंत्री नितेश राणे आढावा

सिंधुदुर्ग : सिंधुदुर्ग जिल्ह्यातील भातशेतीच्या पिकांची सद्यस्थिती आणि संभाव्य दुष्काळी परिस्थितीचा आढावा घेण्यासाठी पालकमंत्री नितेश राणे उद्या सिंधुदुर्ग जिल्ह्याच्या दौऱ्यावर येणार आहेत.

सावंतवाडीपासून वैभववाडीपर्यंत विविध तालुक्यांतील भातशेतीची प्रत्यक्ष पाहणी करताना शेतकऱ्यांच्या अडचणी जाणून घेतल्या जाणार आहेत. तर दुपारी जिल्हाधिकारी कार्यालयात संभाव्य दुष्काळी परिस्थितीबाबत आढावा बैठकही आयोजित करण्यात आली आहे.

सिंधुदुर्गचे पालकमंत्री नितेश राणे रविवार दि. २७ सप्टेंबर रोजी सिंधुदुर्ग जिल्ह्याच्या दौऱ्यावर येणार आहेत. सकाळी ९ वाजता मनोहर आंतरराष्ट्रीय विमानतळ, मोपा, गोवा येथून मोटारीने ते सिंधुदुर्गकडे प्रयाण करतील. यानंतर सकाळी १०.३० वाजता सावंतवाडी तालुक्यातील मळेवाड येथे भातशेतीतील पिक परिस्थितीची पाहणी केली जाणार आहे. त्यानंतर सकाळी ११ वाजता वेंगुर्ला तालुक्यातील होडावडा येथे भातशेतीची पाहणी करण्यात येणार आहे.

दरम्यान, सिंधुदुर्ग जिल्ह्यातील संभाव्य दुष्काळी परिस्थितीच्या पार्श्वभूमीवर दुपारी १ वाजता सिंधुनगरी येथील जिल्हाधिकारी कार्यालयातील सभागृहात आढावा बैठक होणार आहे. या बैठकीनंतर पालकमंत्री नितेश राणे पुन्हा प्रत्यक्ष शेतशिवारात जाऊन पिकांच्या परिस्थितीची पाहणी करणार आहेत. दुपारी ३.३० वाजता कणकवली तालुक्यातील बेळणे खुर्द,
सायंकाळी ४.३० वाजता देवगड तालुक्यातील शिरगाव, शेवरे, तांबळवाडी,
तर सायंकाळी ५.३० वाजता वैभववाडी तालुक्यातील नाधवडे येथे भातशेतीतील पिक परिस्थितीची पाहणी करण्यात येणार आहे.

एकाच दिवशी जिल्ह्यातील विविध तालुक्यांमध्ये प्रत्यक्ष शेतशिवारात जाऊन भातशेतीची पाहणी आणि संभाव्य दुष्काळी परिस्थितीचा प्रशासनाकडून आढावा घेतला जाणार असल्याने पालकमंत्री नितेश राणे यांच्या या दौऱ्याकडे जिल्ह्यातील शेतकऱ्यांचे लक्ष लागले आहे. या पाहणीनंतर शेतकऱ्यांच्या पिकांची सद्यस्थिती, अडचणी आणि संभाव्य उपाययोजनांबाबत प्रशासनाकडून कोणते निर्णय घेतले जातात, हे पाहणे महत्त्वाचे ठरणार आहे.