सावंतवाडी : आरोंदा-मळेवाड तसेच मळेवाड-शिरोडा मार्गाच्या दुतर्फा मोठ्या प्रमाणात वाढलेली झाडी-झुडपे गणेश चतुर्थीपूर्वी तोडण्यात यावीत तोडण्याची मागणी ग्रामस्थ व वाहनचालकांनी केली आहे.
आरोंदा-मळेवाड तसेच मळेवाड-शिरोडा मार्गाच्या दुतर्फा वाढलेली ही झाडी सध्या वाहनचालकांसाठी धोकादायक ठरत असून, अपघातास निमंत्रण ठरत आहे. गणेश चतुर्थीचा सण काही दिवसांवर आला असून, या काळात या मार्गावर वाहनांची व प्रवाशांची मोठी वर्दळ वाढणार आहे. रस्त्याच्या कडेला वाढलेल्या झाडी झुडुपांमुळे वाहनचालकांना समोरून येणारी वाहने स्पष्ट दिसत नसल्याने अपघाताचा धोका निर्माण झाला आहे. या झाडी झुडुपांमुळे वाहनचालकांना अडथळा निर्माण होऊन रस्त्यावर छोटे मोठे अपघात घडत आहेत.
त्यामुळे गणेश चतुर्थीपूर्वी प्रशासनाने तातडीने दखल घेऊन आरोंदा-मळेवाड व मळेवाड-शिरोडा मार्गालगतची वाढलेली झाडी-झुडपे साफ करावीत, अशी मागणी ग्रामस्थ व वाहनचालकांकडून करण्यात येत आहे.
