🌾 भातलावणीवर गवारेड्यांचा हल्ला; वन विभागाकडून तातडीच्या कारवाईची मागणी

सावंतवाडी : रानटी प्राण्यांच्या वाढत्या उपद्रवामुळे शेतकऱ्यांसमोरील अडचणी गंभीर बनल्या आहेत. पाडलोस केणीवाडा येथील शेतकरी राजन तुकाराम नाईक यांनी मोठ्या कष्टाने व खर्च करून केलेली भातलावणी गवारेड्यांच्या कळपाने दुसऱ्यांदा फस्त केल्याने त्यांचे मोठे आर्थिक नुकसान झाले आहे. मध्यंतरी पावसाने दडी मारल्याने मोटरपंपाच्या साहाय्याने पाणी देत त्यांनी भातलावणी केली होती. महागडी खते, वाढलेली मजुरी, शेती मशागतीचा खर्च आणि स्वतःच्या अथक परिश्रमांनंतरही उभे पीक काही क्षणांत उद्धवस्त झाल्याने शेतकरी हतबल झाला आहे. गव्यांनी पुन्हा शेतात प्रवेश करून संपूर्ण लावणीची नासधूस केली. त्यामुळे केवळ आर्थिक नुकसानच नव्हे, तर शेतकऱ्यांच्या मेहनतीवरही पाणी फिरले आहे. अशा घटना वारंवार घडत असल्याने शेतकऱ्यांमध्ये भीती आणि संतापाचे वातावरण आहे.
प्राण्यांचा उपद्रव रोखण्यासाठी वन विभागाची वाट न पाहता राजनं नाईक यांनी शेताभोवती पारंपरिक कुंपण उभे करणे अशा उपाययोजना केल्या आहेत. तरीही रानटी प्राणी येण्याची शक्यता नाकारता येत नाही. वनविभागाने ठोस पावले उचलत शेतीचे संरक्षण करावे, अशी मागणी नाईक यांनी केली आहे.
वन्यप्राण्यांचे संरक्षण जितके महत्त्वाचे आहे, तितकेच शेतकऱ्यांच्या श्रमांचे, उपजीविकेचे संरक्षणही आवश्यक आहे. त्यामुळे वन विभागाने तातडीने प्रभावी उपाययोजना करून रानटी प्राण्यांचा बंदोबस्त करावा, शेतीचे संरक्षण करावे आणि झालेल्या नुकसानीची भरपाई द्यावी, अशी मागणी शेतकरी राजन नाईक यांनी केली आहे.