🥥 कोकणच्या परंपरेसाठी ऐतिहासिक पाऊल; अतुल काळसेकरांचा मोठा पाठपुरावा!

मालवण : महाराष्ट्राच्या समृद्ध कोकण किनारपट्टीवर पिढ्यानपिढ्या चालत आलेल्या आणि नारळी पौर्णिमेच्या मुहूर्तावर खेळल्या जाणाऱ्या ‘नारळ लढवणे’ या ऐतिहासिक व पारंपरिक खेळाला राज्य शासनाकडून ‘अमूर्त सांस्कृतिक वारसा’ म्हणून अधिकृत मान्यता मिळण्याची मागणी जोर धरू लागली आहे. मालवण नगरपरिषदेचे स्वीकृत नगरसेवक रविकिरण तोरसकर यांनी महाराष्ट्राचे सांस्कृतिक कार्य मंत्री आशिष शेलार यांना पत्राद्वारे ही आग्रही विनंती केली आहे. भाजपा महाराष्ट्र राज्य उपाध्यक्ष अतुल काळसेकर हे देखील या मागणीसाठी विशेष पाठपुरावा करत आहेत.
कोकणातील विविध कोळीवाड्यांमध्ये आणि किनारपट्टी भागात गेल्या अनेक शतकांपासून ‘नारळ लढवणे’ हा पारंपरिक खेळ सण-उत्सवासारखा अत्यंत उत्साहात साजरा केला जातो. यामध्ये योग्य नारळाची पारख करणे, अचूक निशाणा साधणे आणि विशिष्ट तंत्राने नारळ लढवणे यासारख्या साहसी व तांत्रिक बाबींचा समावेश असतो. सध्या या खेळाला युवा वर्गासह पर्यटकांचाही मोठा प्रतिसाद मिळत असून अलीकडच्या काळात महिलांसाठीही नारळ लढवण्याच्या स्पर्धा यशस्वीरीत्या आयोजित केल्या जात आहेत.
या परंपरेला शासकीय संरक्षण मिळाल्यास पिढ्यानपिढ्या चालत आलेली ही लोकसंस्कृती पुढील पिढ्यांपर्यंत सुरक्षित राहील. आंतरराष्ट्रीय स्तरावर या खेळाचा प्रसार झाल्यास देश-विदेशातील पर्यटक कोकणाकडे आकर्षित होतील, ज्यामुळे स्थानिक पर्यटनाला मोठा वाव मिळेल. राज्य शासनाने या स्पर्धांचे अधिकृत आयोजन केल्यास युवा आणि महिला वर्गात एका निकोप, कौशल्याधारित आणि साहसी खेळाची आवड निर्माण होईल.
महाराष्ट्र शासनाच्या सांस्कृतिक कार्य विभागाने पुढाकार घेऊन मालवणच्या या ऐतिहासिक ‘नारळ लढवणे’ परंपरेस ‘अमूर्त सांस्कृतिक वारसा’ म्हणून अधिकृत मान्यता द्यावी. राज्य शासनाच्या वार्षिक सांस्कृतिक व पर्यटन कॅलेंडरमध्ये या परंपरेचा समावेश करून त्यास शासकीय प्रोत्साहन देण्यात यावे अशी मागणी करण्यात आली आहे.
कोकणातील हा खेळ केवळ मनोरंजनाचे साधन नसून आपल्या लोकसंस्कृतीचा अमूर्त वारसा आहे. या परंपरेचे महत्त्व लक्षात घेऊन राज्य शासन यावर सकारात्मक निर्णय घेईल, अशी खात्री आहे असा विश्वास श्री. तोरसकर यांनी व्यक्त केला आहे.