👨‍⚕️ सावंतवाडी उपजिल्हा रुग्णालयाच्या अधीक्षकपदी डॉ. विशाल रेड्डी यांची नियुक्ती

सावंतवाडी : सावंतवाडी उपजिल्हा रुग्णालयाच्या वैद्यकीय अधीक्षकपदी डॉ. विशाल रेड्डी यांची नियुक्ती’ करण्यात आली आहे. डॉ. रेड्डी यांनी मंगळवारी पदभार स्वीकारला. यापूर्वीचे वैद्यकीय अधीक्षक डॉ. ज्ञानेश्वर ऐवळे हे दोन महिन्यापूर्वी सेवानिवृत्त झाले होते. त्यामुळे प्रभारी कार्यभार रुग्णालयाचे बालरोगतज्ज्ञ डॉ. संदीप सावंत यांच्याकडे देण्यात आला होता. जिल्हा शल्यचिकित्सक डॉ. श्रीपाद पाटील त्यांच्या आदेशान्वये सावंतवाडी उपजिल्हा रुग्णालयात कार्यरत असलेले हृदयरोग व मधुमेह तज्ज्ञ डॉ. विशाल रेड्डी यांना उपजिल्हा रुग्णालयाच्या वैद्यकीय अधीक्षकपदी नियुक्ती देण्याचे आदेश देण्यात आले. त्या आदेशानुसार डॉ. रेड्डी यांनी मंगळवारी कार्यभार स्वीकारला. डॉ. रेड्डी हे जिल्ह्यात २०१२ सालापासून कार्यरत आहेत. सुरुवातीला देवगड-फणसगाव येथील प्राथमिक आरोग्य केंद्र व नंतर २०१६ मध्ये संभाजीनगर येथे वैद्यकीय पुढील शिक्षण घेऊन २०१९ मध्ये जिल्हा रुग्णालय ओरोस येथे नियुक्ती झाली. २०२४ ते २०२५ पर्यंत कणकवली उपजिल्हा रुग्णालयात सेवा दिली. एप्रिलमध्ये त्यांची सावंतवाडी उपजिल्हा रुग्णालयात नेमणूक करण्यात आली. डॉ. रेड्डी हे हृदयरोग व मधुमेह तज्ज्ञ आहेत. वैद्यकीय अधीक्षकपदाचा पदभार स्वीकारल्यावर त्यांच्याशी संपर्क साधला असता रुग्णांना चांगली सेवा देण्यावर भर राहील, असे स्पष्ट केले.