🇮🇳 युवा नेते विशाल परब यांचा अभिनव पुढाकार; विद्यार्थ्यांसाठी देशभक्तीपर स्पर्धा

सावंतवाडी : स्वातंत्र्यदिनाच्या पार्श्वभूमीवर विद्यार्थ्यांमध्ये राष्ट्रप्रेम, शिस्त आणि सांस्कृतिक मूल्यांची जपणूक व्हावी यासाठी ‘हर घर तिरंगा’ अभियानांतर्गत भाजपचे युवानेते विशाल परब यांच्या वतीने तालुक्यातील हायस्कूल विद्यार्थ्यांसाठी देशभक्तीपर समूहगीत गायन स्पर्धेचे आयोजन करण्यात आले आहे. ही स्पर्धा ११ ऑगस्ट रोजी सकाळी १० वाजता सावंतवाडी येथील श्री जगन्नाथराव भोसले उद्यानात रंगणार आहे.
यामध्ये सावंतवाडी तालुक्यातील सर्व हायस्कूलमधील विद्यार्थी संघांना सहभागी होता येईल. स्पर्धेतील विजेत्या संघांना आकर्षक रोख रक्कमेची पारितोषिके दिली जाणार आहेत. प्रथम क्रमांकासाठी ७,००० रुपये, द्वितीय ५,००० रुपये, तृतीय ४,००० रुपये, चतुर्थ ३,००० रुपये आणि पाचव्या क्रमांकासाठी २,००० रुपये असे बक्षीस दिले जाईल. याशिवाय विजेत्यांना चषक आणि सर्व सहभागी विद्यार्थ्यांना सहभाग प्रमाणपत्र देऊन गौरविण्यात येणार आहे.
स्पर्धेत सहभागी होणाऱ्या प्रत्येक संघात किमान ६ ते कमाल १५ विद्यार्थी असणे आवश्यक आहे. स्पर्धकांना मराठी, हिंदी किंवा संस्कृत भाषेतील राष्ट्रभक्तीपर व प्रेरणादायी समूहगीत सादर करता येईल, मात्र चित्रपट गीतांना प्राधान्य दिले जाणार नाही. प्रत्येक संघाला सादरीकरणासाठी ७ मिनिटांचा वेळ दिला जाईल. संगीत साथीसाठी फक्त हार्मोनियम, तबला, ढोलकी आणि टाळ या पारंपरिक वाद्यांचाच वापर करता येईल. इलेक्ट्रॉनिक संगीत किंवा रेकॉर्डेड ट्रॅक वापरण्यास पूर्ण बंदी असून वादक विद्यार्थदिखील तालुक्यातील हायस्कूलचेच असावेत असा नियम ठेवण्यात आला आहे.
स्पर्धेतील सादरीकरणाचे मूल्यमापन सूर, ताल, शब्दांची स्पष्टता आणि शिस्त या निकषांवर केले जाईल व परीक्षकांचा निर्णय अंतिम राहील. या स्पर्धेत सहभागी होण्यासाठी शाळांना ८ ऑगस्टपर्यंत नावनोंदणी करणे आवश्यक आहे. इच्छुकांनी सावंतवाडी भाजप कार्यालयात दशरथ मांजरेकर (7875525496) किंवा विनेश तावडे (7744057989) यांच्याकडे नावे नोंदवावीत. तालुक्यातील सर्व शाळांनी या स्पर्धेत उत्स्फूर्तपणे भाग घेऊन राष्ट्रभक्तीचा संदेश सर्वत्र पोहोचवावा, असे आवाहन विशाल परब यांनी केले आहे.