मोरगाव येथे खनिजसदृश मातीचा तब्बल २३४.६७ ब्रास साठा आढळला असून महसूल व जिल्हा खनिकर्म प्रशासन आता खडबडून जागे झाले. जिल्हाधिकारी यांच्या सूचनेवरून खनिकर्म विभागाचे पथक बुधवारी तालुक्यात दाखल झाले. या पथकाने माती साठ्यावर काय कारवाई केली असावी? ती माती कोठून आणली असावी? मातीची वाहतूक कोठे केली जात असेल? यामागचे खरे सूत्रधार कोण असावे? असे अनेक सवाल यानिमित्ताने उपस्थित होत आहेत.
त्या मातीच्या साठ्यासंदर्भात तक्रार देऊनही महसूल विभाग कारवाई करण्यास धजावत नव्हता. अखेर याची तक्रार पालकमंत्र्यांकडे केली
मोरगाव येथील ‘त्या’ खनिज युक्त मातीसाठ्यावर कारवाई करण्यासाठी आपल्या विभागामार्फत काही कार्यवाही करण्यात आली का? असे जिल्हाधिकारी अनिल पाटील यांना विचारले असता त्यांनी होकार दिला. कारवाई करण्यासंदर्भात खनिकर्म विभागाला सूचना दिल्याचे त्यांनी स्पष्ट केले आहे. या खनिज प्रकल्पाचे वाहतुकीचे पास घेऊन त्याच्या आड इतरत्र ठिकाणची माती आणून मोरगाव महसूल विभागाने ही कारवाई केली, अशा चर्चांना उधाण आले आहे. त्यामुळे अधिकाऱ्यांनी कारवाई करण्यासाठी तक्रारदारांना प्रत्येक वेळी पालकमंत्र्यांचे नाव सांगावे लागणार का? असा सवाल उपस्थित होत असून पालकमंत्र्यांच्या भूमिकेकडे सर्वांचे लक्ष लागून राहिले आहे.
येथे मातीचा साठा केला जात आहे. हे काम गतवर्षी जोरात सुरू होते. सासोली येथे गतवर्षी कालव्याचीदुरुस्ती करण्यासाठी काढलेली माती, आडाळी एमआयडीसीतील माती, पडवे माजगावमधील माती ही या तस्करांनी चोरल्याची चर्चा जोरदार सुरू होत्या. मात्र त्यावर कोणतीही कार्यवाही न झाल्याने यंदाही आपले फावेल या इराद्याने खनिजतस्करांनी बिनदिक्कतपणे माती वाहतूक सुरू ठेवली. या वाहतुकीची तक्रार एका अज्ञाताने केली आणि खनिज तस्करांचे भिंग फुटले. तक्रारीच्या अनुषंगाने चौकशी करण्यासाठी गेलेल्या तलाठी लोले यांच्या समक्ष एक डंपर माती खाली करत होता. तलाठ्यांनी त्यांचे काम पूर्ण करून सर्व अहवाल तहसील कार्यालयाला पाठवला. या अहवालाच्या आधारावर तहसीलदार अमोल पोवार यांनी माती साठवणूक केलेल्या जमीन मालकांना नोटीस काढली. यानंतर महसूल व जिल्हा खनिकर्म विभाग खडबडून जागा झाला. खनिकर्म विभागाचे एक पथक घटनास्थळी दाखल झाले. या पथकाने नेमकी काय कार्यवाही केली? हे मात्र समजू शकले नाही.
