🐕 मालवणात भटक्या कुत्र्यांचा धुमाकूळ; नागरिकांच्या सुरक्षेचा प्रश्न ऐरणीवर!

मालवण : शहरात दिवसेंदिवस भटक्या कुत्र्यांची संख्या वाढत असून नागरिकांच्या, लहान मुलांच्या सुरक्षेचा प्रश्न गंभीर बनला आहे. कुत्र्यांच्या नियमित, योग्य नसबंदीचा अभाव, वाढते हत्ते, शासकीय रुग्णालयातील रेबीज प्रतिबंधक लसींचा तुटवडा याविरोधात मनसेनेतर्फे आक्रमक भूमिका घेण्यात आली. मालवण पालिकेला याबाबत निवेदन देण्यात आले असून ७ दिवसांच्या आत ठोस कारवाई न झाल्यास पालिका प्रशासनाविरोधात तीव्र आंदोलन छेडण्याचा इशारा मनसे तालुकाध्यक्ष गॅरी अन्ननसिएशन यांनी दिला आहे.
शहरातील विविध भागात भटके कुत्रे नागरिक, लहान मुलांचा पाठलाग करत असून त्यांच्यावर हल्ले करण्याच्या घटना घडत आहेत. शहरात भीतीचे वातावरण आहे. गंभीर बाब म्हणजे, कुत्र्याचा चावा घेतल्यानंतर येथील शासकीय रुग्णालयात उपचारासाठी आवश्यक इंजेक्शने, औषधे अनेकदा उपलब्ध नसतात वा त्यांचा साठा संपलेला असतो. प्रशासनाच्या या कारभाराबद्दल नागरिकांमधून तीव्र संताप व्यक्त होत आहे.
भटक्या कुत्र्यांच्या नसबंदीसाठी प्रति कुत्रा ठराविक निधी मंजूर केला जातो. प्रत्यक्षात नसबंदी न करता केवळ कागदोपत्री काम दाखवून निधीचा गैरवापर केला जात आहे का, असा सवाल मनसेने केला आहे. नसबंदी झालेल्या कुत्र्यांची संख्या, त्यासाठी झालेला खर्च, संबंधित कंत्राटदार वा संस्थेची माहिती पालिकेने पारदर्शकपणे जाहीर करावी, अशी मागणी केली आहे.
शहरातील भटक्या कुत्र्यांची तातडीने गणना करावी, शास्त्रीय व योग्य पद्धतीने कुत्र्यांची नसबंदी मोहीम राबवावी, आतापर्यंत किती कुत्र्यांची नसबंदी झाली, त्यावर किती खर्च झाला, याचा सार्वजनिक अहवाल प्रसिद्ध करावा, कुत्र्यांच्या निधीचा हिशोब नागरिकांसमोर नसबंदीसाठी मंजूर झालेल्या मांडावा, नागरिक व लहान मुलांच्या सुरक्षेसाठी प्रशासनाने तात्काळ पावले उचलावीत. शासकीय रुग्णालयात रेबीज प्रतिबंधक इंजेक्शने, औषधे सतत उपलब्ध राहतील, याची खात्री करावी, अशा मागण्याही केल्या. मनसेने पालिकेला समस्यांवर तोडगा काढण्यासाठी ७ दिवसांची मुदत दिलीय. प्रत्यक्ष, ठोस नसबंदी मोहीम सुरू न झाल्यास लोकशाही मागनि आंदोलन करण्यात येईल, असा इशारा अन्ननसिएशन यांनी दिलाय