🌿 गणेश चतुर्थीपूर्वी आंबा-काजूची नुकसानभरपाई द्या; शिवसेनेचा तहसीलदारांना इशारा!

सावंतवाडी : शासनाने आंबा व काजू उत्पादक शेतकऱ्यांसाठी नुकसानभरपाई मंजूर केली असली, तरी गणेश चतुर्थीपूर्वी ही भरपाई शेतकऱ्यांच्या खात्यावर जमा करावी, अशी ठाम मागणी शिवसेनेच्या शिष्टमंडळाने केली आहे. सणाच्या तोंडावर शेतकऱ्यांना मंजूर झालेल्या मदतीसाठी प्रतीक्षा करायला लावू नका, अशी भूमिका घेत शिष्टमंडळाने सावंतवाडी तहसीलदार श्रीधर पाटील यांची भेट घेत निवेदन दिले.
दरम्यान, शासनाकडून सुरू असलेल्या पीक पाहणी नोंदणीच्या पद्धतीवरही शिवसेनेने गंभीर आक्षेप घेतला आहे. पीक पाहणी नोंदणीचे काम सहाय्यकांकडे सोपविल्याने शेतकऱ्यांच्या नोंदी वेळेत होणे कठीण आहे. एकदा निर्धारित मुदत संपल्यानंतर नोंदणी करता येणार नसल्याने अनेक शेतकरी नुकसानभरपाईपासून वंचित राहण्याची शक्यता आहे.
पीक पाहणी नोंदणी वेळेत न झाल्यास त्याचा थेट फटका शेतकऱ्यांना बसणार आहे. त्यामुळे पूर्वीप्रमाणे पीक पाहणी नोंदणीची जबाबदारी तलाठ्यांकडेच देण्यात यावी, अशी मागणी शिवसेनेने केली. शेतकऱ्यांना कार्यालयांचे उंबरठे झिजवण्यास भाग पाडण्यापेक्षा गावपातळीवर उपलब्ध असलेल्या तलाठी यंत्रणेमार्फत नोंदणीची प्रक्रिया सुलभ करावी, अशी भूमिका यावेळी मांडण्यात आली. शेतकऱ्यांना भरपाई मंजूर करूनही ती वेळेत न देणे आणि पीक नोंदणीच्या तांत्रिक प्रक्रियेत अडकवणे, हा अन्याय ठरू शकतो. त्यामुळे प्रशासनाने तातडीने दोन्ही प्रश्नांवर निर्णय घ्यावा, अशी मागणी करण्यात आली.
तहसीलदार श्रीधर पाटील यांनी या प्रश्नावर लवकरात लवकर तोडगा काढण्यात येईल, असे आश्वासन शिष्टमंडळाला दिले. यावेळी माजी शिवसेना जिल्हाप्रमुख अशोक दळवी, तालुकाप्रमुख नारायण राणे, उपतालुकाप्रमुख गजानन नाटेकर, व्हीजेएनटी अध्यक्ष आनंद वरक, मागासवर्गीय सेल अध्यक्ष राजेश जाधव, तालुका संघटक संजय गावडे, विभागप्रमुख संजय माजगावकर, युवा तालुकाप्रमुख प्रशांत जाधव, सचिव विश्वास घाग, उपविभागप्रमुख संदेश सोनुर्लेकर, ओबीसी उपतालुकाप्रमुख लक्ष्मण भालेकर, सावंतवाडी उपतालुकाप्रमुख राकेश पवार, माजी नगरसेविका स्वप्ना नाटेकर, एकनाथ गावडे यांच्यासह शिवसेना पदाधिकारी उपस्थित होते.