🚔 आजीच्या गळ्यातील सोन्याच्या चैनवर डल्ला; आरोपी डोंबिवलीत पोलिसांच्या जाळ्यात!

संजय पेटकर / कोकणशाही कणकवली – देवगड : शिरगाव-साटमवाडी येथे वयस्कर महिलेच्या गळ्यातील १ लाख ७५ हजार रुपये किमतीची सोन्याची माळ हिसकावून पळून गेलेल्या आरोपीला स्थानिक गुन्हे अन्वेषण शाखा, सिंधुदुर्गच्या पथकाने डोंबिवली येथून शिताफीने जेरबंद केले. तन्मय राजेंद्र साटम (वय २९, मूळ रा. शेवरे, शिरगाव, ता. देवगड, सध्या रा. डोंबिवली) असे आरोपीचे नाव आहे.

शिरगाव-साटमवाडी येथे १६ ऑगस्ट रोजी रात्री साडेआठच्या सुमारास जयश्री सदाशिव बावसकर यांच्या गळ्यातील २५ ग्रॅम वजनाची सोन्याची माळ अज्ञात इसमाने हिसकावून नेली होती. याप्रकरणी देवगड पोलीस ठाण्यात गुन्हा दाखल करण्यात आला होता.

या गुन्ह्याचा समांतर तपास करताना स्थानिक गुन्हे अन्वेषण शाखेच्या पथकाने सीसीटीव्ही फुटेज, तांत्रिक तपास आधारे आरोपीचा शोध घेतला. आरोपी डोंबिवलीतील गणेशनगर परिसरात असल्याची माहिती मिळाल्यानंतर पथकाने सापळा रचून त्याला ताब्यात घेतले. चौकशीत त्याने गुन्ह्याची कबुली दिल्याची माहिती पोलिसांनी दिली.

आरोपीविरुद्ध यापूर्वी शीळ डायघर पोलीस ठाणे, ठाणे पोलीस आयुक्तालयाच्या हद्दीत मंदिरातील दानपेटी चोरीचा गुन्हाही दाखल असून त्या गुन्ह्यात तो पाहिजे आरोपी आहे. पुढील तपासासाठी आरोपीला २ सप्टेंबर रोजी देवगड पोलिसांच्या ताब्यात देण्यात आले.

ही कारवाई पोलीस अधीक्षक मोहन दहिकर, अपर पोलीस अधीक्षक नयोमी साटम यांच्या सूचनेनुसार पोलीस निरीक्षक प्रवीण कोल्हे यांच्या मार्गदर्शनाखाली सहायक पोलीस निरीक्षक सनिल पाटील, ASI राजेंद्र जामसंडेकर, पोलीस हवालदार ज्ञानेश्वर तवटे, आशिष गंगावणे व किरण देसाई यांच्या पथकाने केली.

Related Posts