📰 कुडाळ ते भोसले कॉलेजसाठी एस.टी. बससेवेची मागणी; अभिषेक गावडे यांचे आगार व्यवस्थापकांना निवेदन

कुडाळ : कुडाळ तालुक्यातील विद्यार्थ्यांच्या शैक्षणिक सोयीसाठी कुडाळ ते सावंतवाडी येथील भोसले नॉलेज सिटी, कॉलेज ऑफ इंजिनिअरिंग अँड रिसर्च, चराठा दरम्यान एस.टी. बससेवा सुरू करण्याची मागणी करण्यात आली आहे.

याबाबत कुडाळ शहरप्रमुख तथा नगरसेवक अभिषेक गावडे यांनी कुडाळ एस.टी. आगाराच्या आगार व्यवस्थापकांना निवेदन सादर केले आहे.

निवेदनानुसार, भोसले कॉलेजचे वर्ग सकाळी १० ते सायंकाळी ४ वाजेपर्यंत सुरू असतात. मात्र कुडाळ ते भोसले कॉलेज या मार्गावर योग्य वेळेत एस.टी. बससेवा उपलब्ध नसल्याने कुडाळ, पिंगुळी, ओरोस, कळसुली, आंब्रड आदी भागातील १०० हून अधिक विद्यार्थ्यांना खासगी वाहनाने प्रवास करावा लागत आहे.

खासगी वाहनाने प्रवास करताना विद्यार्थ्यांना अधिक भाडे द्यावे लागत असून त्यांचा आर्थिक भार वाढत आहे. तसेच विशेषतः मुलींच्या सुरक्षिततेचाही प्रश्न निर्माण होत असल्याचे निवेदनात नमूद करण्यात आले आहे.

त्यामुळे विद्यार्थ्यांच्या शैक्षणिक हितासाठी दोन एस.टी. बसफेऱ्या सुरू करण्याची मागणी करण्यात आली आहे.

सकाळची फेरी : कुडाळ बसस्थानक ते भोसले कॉलेज, सावंतवाडी — सकाळी ६:३० वाजता
सायंकाळची फेरी : भोसले कॉलेज, सावंतवाडी ते कुडाळ — सायंकाळी ५:२५ वाजता

ही बससेवा तात्काळ सुरू केल्यास ग्रामीण भागातील विद्यार्थ्यांना मोठा दिलासा मिळेल, त्यांचे शिक्षण नियमित व सुरक्षित होण्यास मदत होईल, असा विश्वास अभिषेक गावडे यांनी व्यक्त केला आहे.

Related Posts