कणकवली रेल्वे स्थानकाचा चेहरामोहरा बदलणार! मंत्री नितेश राणेंच्या हस्ते आधुनिक सिग्नल यंत्रणेचा शुभारंभ!

📍 कणकवली, सिंधुदुर्ग

कणकवली रेल्वे स्थानकाच्या आधुनिकीकरणाच्या दिशेने आणखी एक महत्त्वपूर्ण पाऊल टाकण्यात आले आहे. रेल्वे प्रवास अधिक सुरक्षित आणि सुलभ करण्याच्या दृष्टीने कणकवली रेल्वे स्थानकावर नव्याने उभारण्यात आलेल्या अद्ययावत सिग्नल यंत्रणेचा शुभारंभ आज मत्स्यव्यवसाय व बंदरे मंत्री तथा सिंधुदुर्ग जिल्ह्याचे पालकमंत्री नितेश राणे यांच्या हस्ते करण्यात आला.

या आधुनिक सिग्नल यंत्रणेमुळे रेल्वे गाड्यांचे संचालन अधिक सुरक्षित, सुरळीत आणि कार्यक्षम होण्यास मदत होणार आहे. रेल्वे वाहतुकीतील सुरक्षितता वाढविण्यासोबतच स्थानकाच्या तांत्रिक सुविधांमध्येही यामुळे महत्त्वपूर्ण सुधारणा होणार आहे.

दरम्यान, रेल्वे प्रवाशांसह ज्येष्ठ नागरिक, महिला आणि दिव्यांग प्रवाशांच्या सोयीचा विचार करून कणकवली रेल्वे स्थानकावर लिफ्ट सुविधेच्या कामाचाही शुभारंभ करण्यात आला. या सुविधेमुळे प्लॅटफॉर्मवर ये-जा करणे अधिक सुलभ होणार असून प्रवाशांना मोठा दिलासा मिळणार आहे.

या कार्यक्रमाला मंडल रेल्वे व्यवस्थापक शैलेश बापट यांच्यासह रेल्वे विभागातील अधिकारी, लोकप्रतिनिधी आणि पदाधिकारी उपस्थित होते.

कणकवली रेल्वे स्थानकावर एकीकडे अद्ययावत सिग्नल यंत्रणा, तर दुसरीकडे लिफ्टसारख्या प्रवासी सुविधांची भर पडत असल्याने स्थानकाच्या आधुनिकीकरणाला नवी गती मिळत आहे. त्यामुळे भविष्यात कणकवली रेल्वे स्थानक अधिक आधुनिक आणि प्रवाशांसाठी सोयीस्कर बनण्याच्या दिशेने वाटचाल करत आहे.