मालवण : ऑनलाइन आर्थिक व्यवहारांच्या माध्यमातून होणाऱ्या सायबर फसवणुकीच्या घटना दिवसेंदिवस वाढत असताना आता आचरा येथे एका व्यापाऱ्याला सायबर भामट्यांनी तब्बल ९२ हजार रुपयांचा आर्थिक गंडा घातल्याची घटना समोर आली आहे. संतोष तुळशीदास सामंत यांच्या बँक खात्यातून त्यांच्या माहितीशिवाय रक्कम वळती करण्यात आल्याने परिसरात खळबळ उडाली आहे.
आचरा पोलिसांनी दिलेल्या माहितीनुसार, संतोष सामंत यांनी याप्रकरणी सायबर तक्रार दाखल केली असून, एकूण ९२ हजार रुपयांची फसवणूक झाल्याचे तक्रारीत नमूद करण्यात आले आहे. त्यांच्या बँक खात्यातील रक्कम परस्पर काढून घेतल्याचा प्रकार घडला आहे.
तक्रारीतील व्यवहारांच्या तपशिलानुसार, १७ नोव्हेंबर २०२६ रोजी दुपारी २ वाजून २५ मिनिटांच्या सुमारास फोनपे यूपीआयच्या माध्यमातून बँक ऑफ महाराष्ट्रमधील खात्यातून १२ हजार रुपयांचा व्यवहार झाल्याची नोंद आहे. तसेच २१ हजार ९९९ रुपयांची रक्कम होल्ड करण्यात आल्याचेही तक्रारीत नमूद करण्यात आले आहे.
क्रेडेन्शियल चोरी, बनावट ओळख किंवा ओळख चोरीच्या माध्यमातून हा प्रकार घडल्याचा संशय व्यक्त करण्यात येत आहे. या घटनेमुळे ऑनलाइन व्यवहार करताना नागरिकांनी अधिक सतर्क राहण्याची गरज पुन्हा एकदा अधोरेखित झाली आहे.
दरम्यान, नागरिकांनी अनोळखी लिंकवर क्लिक करू नये, कोणालाही ओटीपी, यूपीआय पिन किंवा बँक खात्याची गोपनीय माहिती देऊ नये. तसेच संशयास्पद आर्थिक व्यवहार आढळल्यास तातडीने बँक आणि सायबर हेल्पलाइन १९३० वर संपर्क साधावा, असे आवाहन करण्यात येत आहे.
ऑनलाइन व्यवहार करताना एका चुकीचा मोठा आर्थिक फटका बसू शकतो, त्यामुळे सावधानता हाच सायबर फसवणुकीपासून बचावाचा सर्वात प्रभावी मार्ग आहे.












