सावंतवाडी : सातार्डा पंचक्रोशीमध्ये मोकाट गुरांचा प्रश्न दिवसेंदिवस गंभीर बनत असून, या गुरांमुळे अपघातांचे प्रमाण वाढत आहे. रस्त्यावर फिरणाऱ्या मोकाट गुरांमुळे अनेक तरुण अपघातात गंभीर जखमी होत आहेत, तर शेतकरी आणि व्यापाऱ्यांनाही मोठ्या आर्थिक नुकसानीला सामोरे जावे लागत आहे. या पार्श्वभूमीवर मोकाट गुरांच्या मालकांनी वेळीच दक्षता घ्यावी, असे आवाहन सावंतवाडी पोलीस ठाण्याचे सहाय्यक पोलीस निरीक्षक हर्षद हिंगे यांनी केले.
सातार्डा ग्रामपंचायत सभागृहात पोलिसांच्या वतीने विशेष ग्रामसभेचे आयोजन करण्यात आले होते. या सभेत मोकाट गुरांच्या वाढत्या समस्येवर सविस्तर चर्चा करण्यात आली.
महाराष्ट्र आणि गोवा राज्यांच्या सीमेवर असलेल्या सातार्डा परिसरात गेल्या वीस वर्षांपासून मोकाट गुरांचा प्रश्न कायम आहे. रस्त्यावर अचानक येणाऱ्या गुरांमुळे वाहनचालकांच्या जीवाला धोका निर्माण होत आहे. अनेक तरुणांना अपघातात गंभीर दुखापत झाली असून, शेतातील पिकांचे तसेच व्यापाऱ्यांच्या व्यवसायाचेही नुकसान होत असल्याच्या तक्रारी यावेळी मांडण्यात आल्या.
ग्रामपंचायतीने मोकाट गुरांच्या बंदोबस्तासाठी अनेक प्रयत्न केले आहेत. मात्र, गुरांचे मालक याकडे दुर्लक्ष करत असल्याने समस्या अधिक गंभीर बनत असल्याच्या प्रतिक्रिया ग्रामसभेत व्यक्त करण्यात आल्या. गावात कोंडवाड्याची इमारत उपलब्ध असतानाही मोकाट गुरांवर नियंत्रण मिळवणे कठीण जात असल्याचे सरपंच संदीप प्रभू आणि पंचायत समिती सदस्य उदय पारिपत्ये यांनी सांगितले. तसेच गुरांना ओळख पटविण्यासाठी बिल्ले टोचण्याचा पर्यायही त्यांनी सुचविला.
यावेळी सहाय्यक पोलीस निरीक्षक हर्षद हिंगे यांनी गुरांच्या मालकांना महत्त्वपूर्ण सूचना केल्या. गुरे पाळण्याची क्षमता नसलेल्या मालकांनी आपली गुरे स्वखुशीने गोशाळेत जमा करावीत. तसेच सायंकाळी गुरांना वेळेत गोठ्यात बांधून ठेवावे. गुरांमुळे कोणताही अपघात होणार नाही किंवा नागरिकांचे नुकसान होणार नाही, याची जबाबदारी मालकांनी घ्यावी, असे त्यांनी स्पष्ट केले.
या विशेष ग्रामसभेला सरपंच संदीप प्रभू, पंचायत समिती सदस्य उदय पारिपत्ये, ग्रामपंचायत सदस्य वासुदेव राऊळ, दशरथ वेंगुर्लेकर, पोलीस पाटील बिनिता मयेकर, सहाय्यक पोलीस उपनिरीक्षक श्रीरंग टाकेकर आदी उपस्थित होते.
एकूणच, सातार्डा परिसरातील मोकाट गुरांचा प्रश्न सोडविण्यासाठी आता ग्रामपंचायत आणि पोलिसांनी पुढाकार घेतला आहे. मात्र, रस्त्यावरील अपघात रोखण्यासाठी गुरांच्या मालकांनीही आपली जबाबदारी ओळखून सहकार्य करणे गरजेचे आहे.
