कोकणशाही न्यूज | विशेष बातमी
कोकणवासीयांसाठी एक अत्यंत महत्त्वाची आणि आनंदाची बातमी समोर आली आहे. सिंधुदुर्ग जिल्ह्यातील चिपी विमानतळावरून आता नवी मुंबईसाठी दररोज विमानसेवा सुरू होण्याचा मार्ग मोकळा झाला आहे. या निर्णयामुळे कोकणच्या हवाई वाहतुकीला मोठी चालना मिळणार असून मुंबई आणि कोकणमधील प्रवास अधिक जलद आणि सोयीस्कर होणार आहे.
महाराष्ट्राचे माजी मुख्यमंत्री तथा कोकणचे भाग्यविधाते खासदार नारायणराव राणे साहेब, तसेच सिंधुदुर्ग जिल्ह्याचे पालकमंत्री ना. नितेश राणे यांच्या प्रयत्नांना यश मिळाल्याची माहिती या संदर्भात प्रसिद्ध करण्यात आली आहे.
महाराष्ट्र विमानतळ विकास कंपनीचे उपाध्यक्ष व व्यवस्थापकीय संचालक श्री. दीपक कपूर यांच्याकडून या विमानसेवेच्या वेळापत्रकाबाबत माहिती देण्यात आली आहे.
काय असेल विमानसेवेचे वेळापत्रक?
प्रसिद्ध करण्यात आलेल्या वेळापत्रकानुसार, नवी मुंबई ते सिंधुदुर्ग अशी पहिली विमानसेवा सकाळी ७ वाजून ५५ मिनिटांनी नवी मुंबईहून प्रस्थान करणार असून सकाळी ९ वाजून ५ मिनिटांनी सिंधुदुर्ग विमानतळावर पोहोचणार आहे.
तर दुसरीकडे सिंधुदुर्ग ते नवी मुंबई विमानसेवा सकाळी ९ वाजून २५ मिनिटांनी चिपी विमानतळावरून उड्डाण करणार असून सकाळी १० वाजून ३५ मिनिटांनी नवी मुंबईत पोहोचणार आहे.
या विमानसेवेमुळे सिंधुदुर्ग जिल्ह्यातील नागरिक, व्यावसायिक, पर्यटक आणि मुंबईला कामानिमित्त जाणाऱ्या प्रवाशांना मोठा फायदा होण्याची अपेक्षा आहे.
कोकणच्या पर्यटनालाही मिळणार नवी दिशा!
सिंधुदुर्ग हा पर्यटनाच्या दृष्टीने अत्यंत महत्त्वाचा जिल्हा आहे. तारकर्ली, देवबाग, मालवण, वेंगुर्ला, आंबोली, कुणकेश्वर यांसारख्या पर्यटनस्थळांना दरवर्षी हजारो पर्यटक भेट देतात.
दररोज विमानसेवा उपलब्ध झाल्यास मुंबई आणि नवी मुंबईतील पर्यटकांना कोकणात येणे अधिक सोपे होईल. याचा थेट फायदा स्थानिक हॉटेल व्यवसाय, पर्यटन व्यावसायिक, वाहतूक व्यावसायिक आणि स्थानिक रोजगाराला होऊ शकतो.
विशेष म्हणजे, कोकणातील नागरिकांना मुंबईपर्यंत पोहोचण्यासाठी लागणारा वेळही मोठ्या प्रमाणात वाचणार आहे.
या महत्त्वपूर्ण निर्णयाबद्दल सातत्याने पाठपुरावा केल्याबद्दल माजी केंद्रीय मंत्री तथा खासदार नारायण राणे साहेब आणि सिंधुदुर्ग जिल्ह्याचे पालकमंत्री नितेश राणे यांचे आमदार निलेश नारायण राणे यांनी मनःपूर्वक आभार व्यक्त केले आहेत.
एकंदरीत, सिंधुदुर्ग ते नवी मुंबई दररोज विमानसेवा हा निर्णय कोकणच्या पर्यटन, व्यापार आणि दळणवळण क्षेत्रासाठी महत्त्वाचा टप्पा ठरू शकतो.
कोकणच्या विकासाला आता मिळणार हवाई गती!
