💧 कणकवलीकरांनो, पाणी जपून वापरा! टंचाई टाळण्यासाठी नगरपंचायतीचे आवाहन

कणकवली – एल निनो’ आणि आयओडी च्या प्रभावामुळे पर्जन्यमानात घट होण्याची शक्यता असल्याने भविष्यात पिण्याच्या पाण्याची टंचाई निर्माण होऊ नये, यासाठी कणकवली शहरातील नागरिकांनी पाण्याचा वापर जपून करावा आणि पाण्याचा अपव्यय टाळावा, असे आवाहन कणकवली नगरपंचायतीच्यावतीने करण्यात आले आहे.
नगरपंचायतीचे मुख्याधिकारी, नगराध्यक्ष व प्रशासनाने प्रसिद्ध केलेल्या या पत्रकात नमूद केले आहे की, नगरपंचायतीच्या मुख्य जलवाहिनीवर किंवा प्रभागात कुठेही पाण्याची गळती (लीकेज) आढळल्यास तसेच पाण्याचा गैरवापर होताना दिसल्यास नागरिकांनी त्याची माहिती तात्काळ प्रशासनाला द्यावी. तसेच नागरिकांनी आपल्या स्वतःच्या नळ कनेक्शनमधील गळती त्वरित दुरुस्त करून घ्यावी. कणकवली शहराला पाणीटंचाईमुक्त आणि समृद्ध ठेवण्यासाठी प्रत्येक नागरिकाचा सहभाग अत्यंत मोलाचा आहे, यासाठी ‘पाणी वाचवूया, भविष्य घडवूया’ असा संकल्प करून नागरिकांनी प्रशासनास सहकार्य करावे.
पाण्याचा अपव्यय रोखण्यासाठी नागरिकांनी नळ उघडे न ठेवणे, घरगुती टाकी व पाईपलाईनची गळती थांबवणे आणि आवश्यक तेवढाच पाण्याचा वापर करणे गरजेचे आहे.
वाहने, अंगण व रस्ते धुण्यासाठी पाण्याचा वापर टाळावा तसेच बांधकामासाठी पाण्याचा अपव्यय करू नये. याशिवाय सार्वजनिक ठिकाणी नळ सुरू राहिल्याचे दिसल्यास, पाणी चोरी किंवा अनधिकृत जोडणी आढळल्यास त्याची माहिती नगरपंचायतीला द्यावी. पाणी गळती अथवा तक्रारींसाठी नागरिकांनी प्रशांत पिळणकर किंवा नगरपंचायतीच्या ०२३६७-२३२००७ या हेल्पलाईन क्रमांकावर संपर्क साधावा.