अहिल्यानगर : बालघरातील मुलांना त्यांच्या नेहमीच्या निवासाच्या वातावरणापेक्षा वेगळे ठिकाण पाहता यावे, त्यांना काही काळ आनंदाचे क्षण अनुभवता यावेत आणि इतर मुलांप्रमाणे हॉटेलमध्ये भोजनाचा अनुभव घेता यावा, या उद्देशाने कृष्णप्रित वेलफेअर फाऊंडेशन, कृष्णाली फाऊंडेशन आणि हॉटेल शिंदेशाही यांच्या संयुक्त विद्यमाने विशेष सामाजिक उपक्रम राबविण्यात आला.
पाइपलाइन रोडवरील हॉटेल शिंदेशाही येथे बालघरातील मुलांसाठी स्नेहभोजनाचे आयोजन करण्यात आले. यावेळी मुलांना शालेय साहित्याचेही वाटप करण्यात आले. मुलांना केवळ आवश्यक वस्तू देण्याऐवजी त्यांच्या रोजच्या वातावरणातून काही काळ बाहेर आणून त्यांना नवीन ठिकाणाचा अनुभव मिळावा, हा या उपक्रमामागील मुख्य उद्देश होता.
अनेक सामाजिक उपक्रमांमध्ये बालघरात जाऊन मुलांना साहित्य किंवा अन्य मदत दिली जाते. मात्र, या उपक्रमात मुलांनाच बालघरातून बाहेर आणून हॉटेलमध्ये भोजनाची व्यवस्था करण्यात आली. हॉटेलमध्ये प्रवेश केल्यापासूनच मुलांमध्ये उत्साहाचे वातावरण होते. वेगळे ठिकाण पाहण्याची उत्सुकता आणि एकत्र भोजन करण्याचा आनंद त्यांच्या चेहऱ्यावर दिसून येत होता.
मुलांसोबत एकत्र भोजन करताना त्यांच्याशी संवाद साधण्यात आला. त्यांच्या आवडी-निवडी जाणून घेण्यात आल्या तसेच त्यांच्यासोबत काही काळ आपुलकीने वेळ घालविण्यात आला. मुलांना वस्तूंची मदत देण्यासोबतच त्यांना वेळ, आपुलकी आणि आनंदाचे क्षण देणेही महत्त्वाचे आहे, या भावनेतून हा उपक्रम राबविण्यात आला.
स्नेहभोजनासोबत मुलांना शालेय साहित्याचे वाटप करण्यात आले. शिक्षणासाठी आवश्यक साहित्य उपलब्ध व्हावे आणि त्यांच्या शैक्षणिक प्रवासाला हातभार लागावा, या उद्देशाने ही मदत देण्यात आली. साहित्य मिळाल्यानंतर मुलांच्या चेहऱ्यावर उमटलेला आनंद उपस्थितांसाठी समाधानाचा क्षण ठरला.
बालघर प्रकल्पाचे संचालक युवराज गुंड यांनी या उपक्रमाबद्दल कृष्णप्रित वेलफेअर फाऊंडेशन, कृष्णाली फाऊंडेशन, हॉटेल शिंदेशाही तसेच सहकार्य करणाऱ्या सर्व उद्योजक, मान्यवर आणि कार्यकर्त्यांचे आभार मानले. मुलांना त्यांच्या नेहमीच्या वातावरणापेक्षा वेगळ्या ठिकाणी नेऊन नवीन अनुभव देण्याची ही संकल्पना संवेदनशील आणि कौतुकास्पद असल्याचे त्यांनी सांगितले.
“मुलांसाठी केलेली मदत महत्त्वाची आहेच; मात्र त्यांच्यासोबत वेळ घालवणे, त्यांना आपुलकी देणे आणि त्यांच्या चेहऱ्यावर हास्य फुलविणे ही त्याहून मोठी गोष्ट आहे. मुलांना त्यांच्या निवासाच्या ठिकाणाबाहेर आणून वेगळा अनुभव देण्याचा हा उपक्रम निश्चितच कौतुकास्पद आहे,” अशी भावना युवराज गुंड यांनी व्यक्त केली.
या उपक्रमास ज्ञानदेव अकोलकर, प्रीतम दौलतराव शिंदे, आबासाहेब सोनवणे, संजय शिंदे, लता आजबे, प्रियंका चेमटे, सनी डेरंगे, प्रिषिता चेमटे, युवराज गुंड, पत्रकार प्रसाद शिंदे, स्वामी गोसावी आणि मोसिन शेख यांची उपस्थिती व सहकार्य लाभले.
या उपक्रमासाठी कृष्णप्रित वेलफेअर फाऊंडेशनचे संचालक व अध्यक्ष प्रशांत पाटील शेळके, हॉटेल शिंदेशाहीचे उद्योजक सुनील शिंदे, Indosculpt Autocomp Pvt. Ltd. चे उद्योजक प्रीतम दौलतराव शिंदे तसेच श्री ट्रॅव्हल्स, अहिल्यानगरचे उद्योजक शिवाजी उबाळे यांचे विशेष सहकार्य लाभले.
