पर्यायी जलस्रोतांचा आराखडा आठ दिवसांत सादर करण्याचे जिल्हाधिकाऱ्यांचे निर्देश
सिंधुदुर्गनगरी : सिंधुदुर्गनगरी परिसरातील पाणीटंचाईच्या पार्श्वभूमीवर प्रशासनाने पाणीपुरवठ्याच्या वेळेत कपात करण्याचा निर्णय घेतला आहे. आता दररोज सकाळी आणि सायंकाळी प्रत्येकी अर्धा तास पाणीपुरवठा कमी केला जाणार आहे. तसेच भविष्यातील पाणीटंचाईवर कायमस्वरूपी उपाययोजना करण्यासाठी पर्यायी पाणीस्रोतांचा सविस्तर आराखडा आठ दिवसांत सादर करण्याचे निर्देश जिल्हाधिकारी तृप्ती धोडमिसे यांनी दिले आहेत.
जिल्हाधिकारी तृप्ती धोडमिसे यांच्या अध्यक्षतेखाली जिल्हाधिकारी कार्यालयात सिंधुदुर्गनगरी नवनगर विकास प्राधिकरण समितीची बैठक पार पडली. या बैठकीत शहरातील पाणीटंचाईसह प्राधिकरणांतर्गत सुरू असलेल्या विविध विकासकामांचा आणि प्रस्तावित प्रकल्पांचा आढावा घेण्यात आला.
सध्या सिंधुदुर्गनगरीत सकाळी ७ ते ९ आणि सायंकाळी ६ ते ७.३० या वेळेत पाणीपुरवठा केला जातो. मात्र, पाण्याची उपलब्धता लक्षात घेता सकाळचा पाणीपुरवठा आता ७ ते ८.३० या वेळेत, तर सायंकाळचा पाणीपुरवठा ६ ते ७ या वेळेत केला जाणार आहे. त्यामुळे नागरिकांनी पाण्याचा काटकसरीने वापर करण्याचे आवाहन प्रशासनाकडून करण्यात आले आहे.
दरम्यान, भविष्यात पाणीटंचाईची समस्या अधिक तीव्र होऊ नये यासाठी पर्यायी जलस्रोतांचा शोध घेण्यावर बैठकीत भर देण्यात आला. सिंधुदुर्गनगरीजवळील धरणसाठ्याचा पर्यायी पाणीस्रोत म्हणून विचार करून त्याची उपलब्धता आणि पाणीपुरवठ्याची शक्यता तपासण्याचे निर्देश देण्यात आले आहेत. यासंदर्भातील सविस्तर आराखडा पुढील आठ दिवसांत सादर केला जाणार आहे.
सिंधुदुर्गनगरीच्या विकासकामांचाही आढावा
पाणीटंचाईच्या प्रश्नासोबतच सिंधुदुर्गनगरीच्या नियोजित विकासकामांनाही बैठकीत प्राधान्य देण्यात आले. छत्रपती शिवाजी महाराज स्मारक, शहर सुशोभीकरण, मुख्य प्रवेशद्वारावर स्वागत कमान आणि व्यापारी संकुल उभारणी याबाबत चर्चा करण्यात आली.
तसेच शहरातील अंतर्गत रस्ते, विद्युत व्यवस्था, सूचना फलक, गतिरोधक आणि दिशादर्शक फलक यांसारख्या मूलभूत सुविधांची कामे नियोजनबद्ध पद्धतीने पूर्ण करण्यावर भर देण्यात आला. क्रीडा संकुलासाठी आवश्यक जागा उपलब्ध करून तेथे अपेक्षित सुविधा निर्माण करण्याची प्रक्रियाही गतिमान करण्याचे निर्देश देण्यात आले.
१ डिसेंबरपासून स्वच्छता शुल्क आकारणी
सिंधुदुर्गनगरीतील स्वच्छता आणि कचरा व्यवस्थापन अधिक प्रभावी करण्यासाठी येत्या १ डिसेंबरपासून स्वच्छता शुल्क आकारले जाणार आहे. यामध्ये निवासी मालमत्तांसाठी दरमहा १०० रुपये, तर वाणिज्य वापरासाठी दरमहा २०० रुपये शुल्क निश्चित करण्यात आले आहे.
घरोघरी कचरा संकलनासाठी वाहने उपलब्ध करून देण्यात आली असून, शहरातील स्वच्छता व्यवस्था अधिक शिस्तबद्ध करण्याचा प्रशासनाचा प्रयत्न आहे. या उपक्रमाला नागरिकांनी सहकार्य करावे, असे आवाहन करण्यात आले आहे.
या बैठकीला अतिरिक्त मुख्य कार्यकारी अधिकारी शितल पुंड, तहसीलदार चैताली पवार यांच्यासह समितीचे सदस्य, आरोग्य, पाणीपुरवठा, जलसंपदा, नगर प्रशासन विभागांचे अधिकारी, जिल्हा नियोजन अधिकारी आणि सार्वजनिक बांधकाम विभागाचे कार्यकारी अभियंता उपस्थित होते.
पाणीटंचाईवर तात्पुरती पाणीकपात आणि भविष्यासाठी पर्यायी जलस्रोतांचे नियोजन, अशा दुहेरी उपाययोजनांद्वारे सिंधुदुर्गनगरीतील पाणीपुरवठ्याचा प्रश्न मार्गी लावण्याचे प्रशासनाचे प्रयत्न सुरू आहेत.












