💚 रक्षाबंधनाचा अनोखा सोहळा! देवबागच्या विद्यार्थ्यांनी बांधली झाडाला पर्यावरणपूरक राखी

मालवण : रक्षाबंधनाचे औचित्य साधून आणि पर्यावरणाचा संदेश देण्याच्या उद्देशाने ‘अखिल देवबाग विकास मंडळ मुंबई’ संचालित डॉ. दत्ता सामंत इंग्लिश स्कूल, देवबाग या प्रशालेत आज ‘आनंददायी शनिवार’ या संकल्पनेअंतर्गत शाळेतील विद्यार्थी आणि शिक्षकांनी एकत्र येत ‘वृक्षबंधन’ हा कार्यक्रम अत्यंत उत्साहात साजरा केला.
नेहमीच्या पारंपरिक रक्षाबंधनापेक्षा काहीतरी वेगळे करत समाजाला निसर्ग संवर्धनाचा संदेश देण्यासाठी सौ. मेस्त्री यांच्या संकल्पनेतून हा उपक्रम साकारण्यात आला होता. याप्रसंगी, शाळेच्या जवळ असलेल्या समुद्रकिनाऱ्यावरील नारळाच्या झाडाला विद्यार्थ्यांनी व शिक्षकांनी स्वतः तयार केलेली एक अत्यंत मोठी, सुंदर आणि आकर्षक राखी बांधली.
केवळ भावाने बहिणीचे रक्षण करणे एवढ्यापुरता मर्यादित न राहता, मानवाने पर्यावरणाचे आणि वृक्षांचे रक्षण करणे काळाची गरज आहे, हा मोलाचा संदेश या अनोख्या राखीच्या माध्यमातून देण्यात आला. विशेष म्हणजे, ही राखी पूर्णपणे पर्यावरणपूरक वस्तूंपासून तयार करण्यात आली होती.
समुद्रकिनाऱ्यावरील निसर्गरम्य वातावरणात पार पडलेल्या या कार्यक्रमात शाळेच्या मुख्याध्यापिका रचना रुपेश खोबरेकर, शिक्षकवृंद आणि विद्यार्थी मोठ्या संख्येने सहभागी झाले होते. या उपक्रमामुळे विद्यार्थ्यांमध्ये पर्यावरणाविषयी विशेष कौतुक आणि जागरूकतेची भावना निर्माण झाली.
शाळेचे व्यवस्थापन आणि अखिल देवबाग विकास मंडळाच्या पदाधिकाऱ्यांनी या अभिनव कल्पनेचे मनापासून कौतुक केले असून, भविष्यातही अशा पर्यावरणपूरक उपक्रमांवर भर दिला जाईल असा विश्वास व्यक्त केला. ‘वृक्षवल्ली आम्हा सोयरे वनचरे’ या उक्तीला खऱ्या अर्थाने सार्थ ठरणारा हा ‘वृक्षबंधन’ उपक्रम उपस्थितांसाठी आणि परिसरासाठी अत्यंत प्रेरणादायी ठरला.
हा कार्यक्रम यशस्वी करण्यासाठी सौ. मेस्त्री, सौ. गोसावी, कु. मांजरेकर आणि गजानन मांजरेकर यांचे विशेष मार्गदर्शन लाभले, तसेच इतर सर्व शिक्षक व शिक्षकेतर कर्मचाऱ्यांचे मोलाचे सहकार्य लाभले.