सिंधुदुर्ग : मराठा आरक्षणाच्या मुद्द्यावरून राज्यातील राजकीय वातावरण तापलेले असतानाच आमदार निलेश नारायण राणे यांनी सोशल मीडियावरील पोस्टद्वारे मनोज जरांगे पाटील यांच्यावर निशाणा साधला आहे. आर्थिक व्यवहारांबाबत केल्या जाणाऱ्या चर्चांवर प्रश्न उपस्थित करत निलेश राणे यांनी पुराव्यांच्या मुद्द्यावरून जरांगे पाटील यांना लक्ष्य केले आहे.
“कोणतरी बोलणारं एकाकडून घेऊन दुसऱ्याला ५०० कोटी दिले म्हणजे पुरावा झाला का?” असा सवाल आमदार निलेश राणे यांनी आपल्या पोस्टमध्ये उपस्थित केला आहे. कोकणातील विविध टीकाटिप्पणी आणि आर्थिक व्यवहारांबाबत रोज चर्चा होत असतात. मात्र, अशा चर्चांचा बोलणाऱ्यावर किंवा ऐकणाऱ्यावर काहीही फरक पडत नसल्याचेही त्यांनी म्हटले आहे.
आपल्या पोस्टमध्ये आमदार निलेश राणे यांनी, “रोज आमच्या कोकणाच्या कुठल्या ना कुठल्या टीकाटिप्पणीवर अमुकाने पैसे घेतले आणि अमुकाने पैसे दिले असे रोज चर्चा होतात,” असे नमूद करत अशा आरोपांच्या विश्वासार्हतेवर प्रश्नचिन्ह उपस्थित केले आहे.
याच पोस्टमध्ये त्यांनी मनोज जरांगे पाटील यांच्यावर टीका करताना, “जरांगे पाटील जरातरी माणुसकी आणि लाज स्वतःमध्ये जिवंत असायला पाहिजे होती,” अशी कठोर टिप्पणी केली आहे.
आमदार निलेश राणे यांच्या या पोस्टमुळे राजकीय वर्तुळात चर्चेला उधाण येण्याची शक्यता आहे. दरम्यान, पोस्टमध्ये उल्लेख केलेल्या ५०० कोटी रुपयांच्या कथित व्यवहाराबाबत स्वतंत्र पुरावे किंवा अधिकृत पुष्टी या पोस्टवरून स्पष्ट होत नाही. त्यामुळे या दाव्याची सत्यता स्वतंत्रपणे पडताळणे आवश्यक आहे.
