🚨 भरधाव ‘कोंबडी’ वाहनांचा कहर! अपघातांचा धोका वाढला; मनसेने पोलिसांकडे केली मोठी मागणी

दोडामार्ग : चंदगड-दोडामार्ग-गोवा मार्गावर कोंबडी वाहतूक करणारी वाहने भरधाव वेगाने धावत असल्याने वारंवार अपघात घडत असून नागरिकांच्या जीविताला गंभीर धोका निर्माण झाला आहे. या वाहनांच्या वेगावर तातडीने नियंत्रण आणून कठोर कारवाई करावी, अशी मागणी महाराष्ट्र नवनिर्माण सेनेच्या वतीने दोडामार्ग पोलीस ठाण्यात निवेदनाद्वारे करण्यात आली.
मनसेच्या निवेदनात नमूद करण्यात आले आहे की, या मार्गावर धावणाऱ्या अनेक कोंबडी वाहतूक करणाऱ्या वाहनांचे चालक नशेत अथवा झोपेच्या अवस्थेत वाहन चालवत असल्याचा संशय व्यक्त केला जात आहे. तसेच काही वाहनांमधून अवैध दारूची वाहतूक होत असल्याचाही संशय असल्याने अशा वाहनांची सखोल तपासणी करण्याची मागणी करण्यात आली आहे.
शनिवारी सोनावल येथील एका युवकाचा कोंबडी वाहतूक करणाऱ्या वाहनाच्या धडकेत दुर्दैवी मृत्यू झाला. या घटनेमुळे परिसरात संताप व्यक्त होत असून भविष्यात अशा घटना टाळण्यासाठी या मार्गावरील कोंबडी वाहतूक करणाऱ्या वाहनांवर विशेष लक्ष ठेवून त्यांच्या वेगावर नियंत्रण ठेवावे, वाहतूक नियमांचे काटेकोर पालन करावे आणि नियमभंग करणाऱ्यांवर कठोर कारवाई करावी, अशी मागणी मनसेने केली आहे.
यावेळी मनसेचे माजी उपजिल्हाप्रमुख दत्ताराम गावकर यांच्यासह मुकुंद परब, अक्षय कुबल, संदेश सावंत, नवलू झोरे, नितीन देसाई, रत्नदीप गवस, अनुराग रेडकर, नाना देसाई, अर्जुन धुरी आदी मनसैनिक उपस्थित होते.