🎯 कणकवलीचे नगराध्यक्ष संदेश पारकर यांच्यावर नवी जबाबदारी; आरोग्यवर्धिनी समितीवर निवड

कणकवली : शासनाच्या सार्वजनिक आरोग्य विभागाने राज्यातील आरोग्य विषयक उपक्रम अधिक लोकाभिमुख, गतिमान आणि प्रभावी करण्याच्या उद्देशाने जिल्हास्तरीय एकात्मिक आरोग्यवर्धिनी समिती स्थापन केली असून, या समितीवर कणकवलीचे नगराध्यक्ष संदेश पारकर यांची सदस्यपदी नियुक्ती करण्यात आली आहे.
जिल्हा शल्य चिकित्सक तथा जिल्हास्तरीय एकात्मिक आरोग्यवर्धिनी समितीचे सदस्य सचिव डॉ. श्रीपाद एम. पाटील यांनी संदेश पारकर यांना पत्राद्वारे नियुक्तीची माहिती दिली आहे. महाराष्ट्र शासनाच्या सार्वजनिक आरोग्य विभागाच्या १४ मे २०२६ रोजीच्या शासन निर्णयानुसार ही समिती गठित करण्यात आली आहे.
राज्यातील आरोग्य सेवा अधिक सक्षम, गुणवत्तापूर्ण आणि परिणामकारक करण्यासाठी तसेच राष्ट्रीय आरोग्य अभियान व शासनाच्या आरोग्य योजनांची प्रभावी अंमलबजावणी, विविध विभागांमध्ये समन्वय, नागरिकांच्या आरोग्य समस्यांचे निराकरण, आरोग्य संस्थांच्या कामकाजाचा आढावा, जनसहभाग वाढविणे या उद्देशाने समितीची स्थापना केली आहे.
जिल्हा समितीचे अध्यक्ष पालकमंत्री नीतेश राणे असणार आहेत. जि. प. अध्यक्ष, नगराध्यक्ष, जिल्हाधिकारी, सीईओ, जिल्हा आरोग्य अधिकारी, जिल्हा शल्य चिकित्सक, वरिष्ठ अधिकारी आणि लोकप्रतिनिधी यांचा समावेश करण्यात आला आहे.