🔥 रुपेश पावसकर यांच्या पाठपुराव्याला यश; शिक्षण विभागाचा ऐतिहासिक निर्णय

कुडाळ : सिंधुदुर्ग जिल्ह्यातील सर्व सरकारी व खासगी शाळांमध्ये विद्यार्थी आणि पालकांना विशिष्ट दुकानातूनच वह्या, पुस्तके अथवा स्टेशनरी खरेदी करण्याची सक्ती आता करता येणार नाही. जिल्हा परिषद सिंधुदुर्गच्या शिक्षण विभागाने यासंदर्भात अत्यंत महत्त्वाचा आदेश जारी केला आहे.
नेरुर देऊळवाडा येथील जिल्हा परिषद सदस्य रुपेश अशोक पावसकर यांनी शासकीय व खासगी शाळांमधून होणाऱ्या बेकायदेशीर विक्री आणि सक्तीबाबत शिक्षण विभागाकडे तक्रार दाखल केली होती. त्यांच्या या पत्राची तात्काळ दखल घेत माध्यमिक शिक्षणाधिकाऱ्यांनी सर्व माध्यमिक व उच्च माध्यमिक शाळांना अधिकृत पत्र पाठवून कडक सूचना दिल्या आहेत.
या नवीन आदेशानुसार, शाळांच्या आवारात वह्या, पुस्तके किंवा इतर कोणत्याही स्टेशनरीची विक्री करण्यास पूर्णपणे बंदी घालण्यात आली आहे. पालकांना त्यांच्या सोयीनुसार आणि इच्छेनुसार कुठूनही शैक्षणिक साहित्य खरेदी करण्याचे पूर्ण स्वातंत्र्य असेल. या नियमांचे उल्लंघन करणाऱ्या शाळांवर शिक्षण विभागाकडून कडक कारवाई केली जाईल, असा इशाराही देण्यात आला आहे.