😟 देवगडकरांना मोठा धक्का! देवगड-बोरिवली बसफेरी अचानक बंद

देवगड : देवगड-बोरिवली ही नियमित बसफेरी गेल्या काही दिवसांपासून अचानक बंद करण्यात आल्याने प्रवाशांची गैरसोय होतेय. कमी भारमानामुळे ही बस सद्यस्थितीत बंद केल्याची माहिती आगार व्यवस्थापक सौरभ औंधकर यांनी दिली असून ऑगस्टमध्ये ही ती पूर्ववत सुरू होईल, असे त्यांनी सांगितले. देवगड आगारातून देवगड-बोरिवली ही बसफेरी गेली अनेक वर्षे नियमित सुरू होती. परंतु सद्यस्थितीत ही बसफेरी गेल्या काही दिवसांपासून अचानक बंद करण्यात आली. परिणामी, या मार्गावरील अनेक प्रवाशांची मोठी गैरसोय झाली. प्रवाशांना खासगी वाहतुकीचा आधार घ्यावा लागत असून नाहक आर्थिक भुर्दंड सहन करावा लागत आहे. देवगड-बोरिवली बसफेरी पूर्ववत सुरू करावी. बंद असलेल्या इतर बसफेऱ्याही नियमित कराव्यात आणि प्रवाशांची होणारी गैरसोय दूर करावी, अशी मागणी प्रवासी वर्गातून होत आहे.