देवगड : राज्यस्तरीय पदावर निवड झालेले महाराष्ट्रातील सर्वात तरुण अस्थिरोगतज्ज्ञ; देवगडच्या वैद्यकीय क्षेत्रासाठी अभिमानास्पद कामगिरी.
देवगड मेडिकल फाउंडेशनचे अस्थिरोगतज्ज्ञ डॉ. तन्मय सुनील आठवले यांची प्रतिष्ठित महाराष्ट्र ऑर्थोपेडिक असोसिएशनच्या सहायक वेबमास्टरपदी तसेच कार्यकारी समिती सदस्यपदी निवड झाली आहे. अत्यंत कमी वयात महाराष्ट्रातील अस्थिरोगतज्ज्ञांच्या राज्यस्तरीय संघटनेत महत्त्वाची जबाबदारी मिळवणारे ते राज्यातील सर्वात तरुण अस्थिरोगतज्ज्ञ ठरले असून, त्यांच्या या उल्लेखनीय यशामुळे देवगडसह संपूर्ण सिंधुदुर्ग जिल्ह्याच्या वैद्यकीय क्षेत्राच्या शिरपेचात मानाचा तुरा रोवला गेला आहे.
महाराष्ट्र ऑर्थोपेडिक असोसिएशन ही राज्यातील अस्थिरोगतज्ज्ञांची प्रमुख आणि मान्यताप्राप्त व्यावसायिक संघटना आहे. राज्यभरातील अस्थिरोगतज्ज्ञांना अत्याधुनिक वैद्यकीय ज्ञान, संशोधन, शैक्षणिक कार्यक्रम, परिषदांचे आयोजन आणि आधुनिक उपचारपद्धतींशी जोडण्याचे महत्त्वपूर्ण कार्य या संघटनेच्या माध्यमातून केले जाते. अशा प्रतिष्ठित संघटनेच्या कार्यकारी समितीमध्ये डॉ. तन्मय आठवले यांची झालेली निवड ही त्यांच्या वैद्यकीय, शैक्षणिक आणि तांत्रिक कार्यक्षमतेची पावती मानली जात आहे.
सहायक वेबमास्टर म्हणून डॉ.आठवले यांच्यावर महाराष्ट्र ऑर्थोपेडिक असोसिएशनच्या डिजिटल शैक्षणिक उपक्रमांची महत्त्वपूर्ण जबाबदारी सोपविण्यात आली आहे. संघटनेतर्फे आयोजित करण्यात येणाऱ्या विविध शैक्षणिक वेबिनारचे नियोजन आणि संचालन, एमओएच्या अधिकृत संकेतस्थळ व मोबाइल अॅपचे व्यवस्थापन, डिजिटल शैक्षणिक साहित्याचे प्रसारण तसेच एमओएच्या ऑनलाइन शैक्षणिक व्यासपीठावरून थेट शस्त्रक्रियांचे प्रक्षेपण आणि समन्वय अशा विविध जबाबदाऱ्या ते सांभाळणार आहेत.
वैद्यकीय क्षेत्रात डिजिटल तंत्रज्ञानाचा वापर झपाट्याने वाढत असताना, महाराष्ट्रातील अस्थिरोगतज्ज्ञांना नवीन संशोधन, अद्ययावत उपचारपद्धती, तज्ज्ञांचे मार्गदर्शन आणि प्रत्यक्ष शस्त्रक्रियांचे प्रशिक्षण उपलब्ध करून देण्यासाठी एमओएचे डिजिटल व्यासपीठ अत्यंत महत्त्वाचे ठरत आहे. या कामासाठी ग्रामीण भागातील तरुण, तंत्रज्ञानस्नेही आणि शैक्षणिक उपक्रमांमध्ये सक्रिय असलेल्या डॉ. तन्मय आठवले यांची निवड होणे विशेष महत्त्वाचे मानले जात आहे.
नुकतेच डॉ. आठवले यांना महाराष्ट्र ऑर्थोपेडिक असोसिएशनच्या कार्यकारी परिषदेच्या बैठकीसाठी निमंत्रित करण्यात आले होते. या बैठकीत राज्यातील अस्थिरोगविषयक शिक्षणाचा दर्जा अधिक उंचावणे, डिजिटल माध्यमांचा प्रभावी वापर करणे, तरुण अस्थिरोगतज्ज्ञांना व्यासपीठ उपलब्ध करून देणे आणि राज्यभरातील डॉक्टरांना शैक्षणिकदृष्ट्या परस्परांशी जोडणे यांसारख्या महत्त्वपूर्ण विषयांवर चर्चा करण्यात आली.
डॉ. तन्मय आठवले हे अनेक राष्ट्रीय आणि आंतरराष्ट्रीय अस्थिरोग संघटना व संस्थांचे सदस्य आहेत. आधुनिक अस्थिरोग उपचार, शैक्षणिक उपक्रम, संशोधन आणि वैद्यकीय क्षेत्रातील नवीन तंत्रज्ञान यांचा सातत्याने अभ्यास करून ते ग्रामीण भागातील रुग्णांना शहरांप्रमाणे दर्जेदार उपचार उपलब्ध करून देण्याचा प्रयत्न करत आहेत. ते पुण्यातील नामांकित संचेती इन्स्टिट्यूट ऑफ ऑर्थोपेडिक्स अँड ट्रॉमाचे पॅनेल डॉक्टर म्हणूनही कार्यरत आहेत.
डॉ. आठवले हे OrthoTV शीही सक्रियपणे संलग्न आहेत. विविध राष्ट्रीय आणि आंतरराष्ट्रीय अस्थिरोग परिषदांमध्ये त्यांनी भारतातील तसेच परदेशातील अनेक नामवंत अस्थिरोगतज्ज्ञ, संशोधक आणि वैद्यकीय क्षेत्रातील प्रतिष्ठित व्यक्तींच्या मुलाखती व पॉडकास्टचे यशस्वी संचालन केले आहे. या संवादांच्या माध्यमातून वैद्यकीय ज्ञान सर्वसामान्य डॉक्टरांपर्यंत पोहोचवणे, तज्ज्ञांच्या अनुभवातून तरुण डॉक्टरांना प्रेरणा देणे आणि अस्थिरोग क्षेत्रातील नवीन संकल्पनांना व्यासपीठ मिळवून देणे हा त्यांचा प्रयत्न राहिला आहे.
सध्या डॉ. तन्मय आठवले हे देवगड येथील देवगड मेडिकल फाउंडेशनमध्ये पूर्णवेळ अस्थिरोगतज्ज्ञ म्हणून सेवा देत आहेत. देवगडसारख्या ग्रामीण भागात आधुनिक अस्थिरोग उपचार सुविधा उपलब्ध करून देण्यात त्यांचे महत्त्वपूर्ण योगदान आहे. याशिवाय ते महिन्यातून दोन वेळा शासकीय ग्रामीण रुग्णालय, देवगड आणि डॉ. शिवेश्वरकर हॉस्पिटल, आचरा येथेही रुग्णसेवा देतात. त्यामुळे देवगड आणि आचरा परिसरातील रुग्णांना नियमितपणे तज्ज्ञ अस्थिरोग सेवा उपलब्ध होत आहेत.
मोठ्या शहरांतील संधींचा पाठपुरावा करण्याऐवजी आपल्या मातृभूमीत राहून ग्रामीण रुग्णसेवेला प्राधान्य देतानाच राज्य, राष्ट्रीय आणि आंतरराष्ट्रीय स्तरावर स्वतःची स्वतंत्र ओळख निर्माण करणे, ही डॉ. आठवले यांच्या कामगिरीची विशेष बाब मानली जात आहे. वैद्यकीय सेवा, डिजिटल शिक्षण, पॉडकास्ट, संघटनात्मक कार्य आणि सामाजिक बांधिलकी यांचा समतोल साधत त्यांनी तरुण डॉक्टरांसमोर एक प्रेरणादायी आदर्श निर्माण केला आहे.
अत्यंत कमी वयात मिळवलेल्या या प्रतिष्ठित राज्यस्तरीय जबाबदारीबद्दल डॉ. तन्मय आठवले यांचे देवगड, सिंधुदुर्ग जिल्हा तसेच राज्यभरातील वैद्यकीय, सामाजिक आणि विविध क्षेत्रांतील मान्यवरांकडून अभिनंदन करण्यात येत आहे. ग्रामीण भागातील डॉक्टरही आपल्या ज्ञान, कौशल्य, कल्पकता आणि सातत्यपूर्ण प्रयत्नांच्या बळावर राज्य व राष्ट्रीय स्तरावर नेतृत्व करू शकतात, हे डॉ.आठवले यांनी आपल्या कार्यातून सिद्ध केले आहे.
त्यांच्या या यशामुळे देवगड मेडिकल फाउंडेशनच्या सात दशकांच्या वैद्यकीय परंपरेला नवा आयाम प्राप्त झाला असून, देवगडचे नाव महाराष्ट्राच्या वैद्यकीय आणि शैक्षणिक नकाशावर अधिक ठळकपणे अधोरेखित झाले आहे.
