🚤⚡ ‘ग्रीन मुंबई’कडे आणखी एक पाऊल; गेटवेवरील बोटी होणार इलेक्ट्रिक । Kokanshahi ।

गेटवे परिसरातील लाकडी बोटींचे इलेक्ट्रिक बोटींमध्ये रूपांतर करण्यासाठी मुंबई बँकेमार्फत आर्थिक सहाय्य आणि विशेष कर्ज योजना उपलब्ध करून देण्यासंदर्भात आज मुंबई बँकेचे अध्यक्ष प्रवीणजी दरेकर यांच्यासोबत मंत्री मत्यव्यवसाय व बंदरे, महाराष्ट्र राज्य पालकमंत्री नितेश राणेंच्या उपस्थितीत बैठक झाली.

मुंबईच्या गेटवे परिसरात डिझेलवर चालणाऱ्या ९७ परवानाधारक लाकडी बोटी कार्यरत आहेत, ज्यामुळे बोट मालकांना दरमहा अंदाजे १ लाख रुपयांचा इंधन खर्च येतो. पंतप्रधान श्री नरेंद्र मोदीजींच्या इंधन बचत आणि हरित पर्यावरणाच्या आवाहनाला प्रतिसाद म्हणून, मुंबईतील प्रवासी आणि मासेमारी बोटींचे इलेक्ट्रिक बोटींमध्ये रूपांतर करून पर्यावरणपूरक पर्यटनाला चालना देणे आणि बोट मालकांचा खर्च कमी करण्यावर चर्चा झाली.

इलेक्ट्रिक बोटींची किंमत अंदाजे २.५ कोटी ते ६ कोटी रुपयांपर्यंत असल्याने, मत्स्य सहकारी संस्था, खाजगी बोट मालक, वैयक्तिक लाभार्थी आणि संघटनांसाठी कमी व्याजदरात विशेष कर्ज योजना उपलब्ध करून देण्यासाठी मुंबई बँकेने एक स्वतंत्र धोरण तयार करण्याबाबत बैठकीत चर्चा झाली.

दरम्यान, या उपक्रमाच्या सुरुवातीच्या टप्प्यात २५ लाभार्थ्यांना प्राधान्य देण्याचा आणि त्यापैकी पहिल्या ५ जणांना प्रायोगिक तत्त्वावर इलेक्ट्रिक बोटी देण्याचा प्रस्ताव सादर करण्यात आला. याव्यतिरिक्त, मुंबई बँक इलेक्ट्रिक बोटींसाठी एक विशेष धोरण तयार करून ते आगामी संचालक मंडळाच्या बैठकीत मंजुरीसाठी सादर करेल, असा विश्वास आमदार प्रवीण दरेकर यांनी यावेळी व्यक्त केला.

Related Posts