सावंतवाडी : सावंतवाडी नगरपरिषदेच्या रिक्त असलेल्या उपनगराध्यक्ष पदासाठी आज झालेल्या चुरशीच्या निवडणुकीत भारतीय जनता पक्षाचे अॅड. अनिल निरवडेकर यांनी बाजी मारली आहे. त्यांनी आपले प्रतिस्पर्धी उमेदवार शिवसेनेचे नगरसेवक अजय गोंदावळे यांचा पराभव केला. या विजयामुळे सावंतवाडी नगरपरिषदेवर भाजपचे वर्चस्व पुन्हा एकदा अधोरेखित झाले आहे.
निवडणूक प्रक्रियेत एकूण मतांचे विभाजन खालीलप्रमाणे
अॅड. अनिल निरवडेकर (भाजप): १२ मते
अजय गोंदावळे (शिवसेना): ७ मते
तटस्थः २ (काँग्रेसचे तौकीर शेख व उबाठाचे देवेंद्र टेमकर)
आज सकाळी नगराध्यक्षा श्रद्धाराजे भोंसले आणि भाजप युवा मोर्चा प्रदेश उपाध्यक्ष युवराज लखमराजे भोंसले यांच्या उपस्थितीत अॅड. अनिल निरवडेकर यांनी आपला उमेदवारी अर्ज मुख्याधिकाऱ्यांकडे सुपूर्द केला होता. शिवसेनेकडून अजय गोंदावळे यांनी आव्हान उभे केले होते. दुपारी छाननी प्रक्रियेनंतर दोन्ही अर्ज वैध ठरल्याने मतदान प्रक्रिया पार पडली.
भाजप विजयी गटः अॅड. निरवडेकर यांना नगराध्यक्षा श्रद्धाराजे भोंसले यांच्यासह सुधीर आडीवरेकर, आनंद नेवगी, प्रतिक बांदेकर, दीपाली भालेकर, मोहिनी मडगांवकर, नीलम नाईक, वीणा जाधव, सुनिता पेडणेकर, दुलारी रांगणेकर आणि सुकन्या टोपले अशा एकूण १२ सदस्यांनी मतदान केले.
शिवसेना गटः अजय गोंदावळे यांना संजू परब, बाबू कुडतरकर, शर्वरी धारगळकर, अॅड. सायली दुभाषी आणि स्नेहा नाईक या ७ सदस्यांचे समर्थन मिळाले.
स्वीकृत सदस्य पदी बिनविरोध निवड
उपनगराध्यक्ष निवडीसोबतच स्वीकृत सदस्य पदाची प्रक्रियाही पूर्ण करण्यात आली. यामध्येः
अॅड. सिद्धार्थ भांबुरे (भाजप)
अॅड. नीता कविटकर (शिवसेना)
या दोघांचीही बिनविरोध निवड झाल्याचे नगराध्यक्षांनी जाहीर केले.
विजय घोषित होताच भाजपच्या नगरसेवकांनी टाळ्यांच्या कडकडाटात आणि बाके वाजवून अॅड. अनिल निरवडेकर यांचे अभिनंदन केले. सावंतवाडी शहराच्या राजकारणात भाजपची ही पकड आगामी काळासाठी महत्त्वाची मानली जात आहे.