मालवण
महाराष्ट्र जलधी क्षेत्रात मालवण किल्ल्यासमोर ११ सागरी मैल येथे अनधिकृतरीत्या एल.ई.डी. लाईटद्वारे मासेमारी करणाऱ्या गोवा येथील एल.ई.डी. नौकेवर सिंधुदुर्ग मत्स्य विभागाने कारवाई केली. नौका जप्त करून ती सर्जेकोट बंदरात ठेवण्यात आली.पुढील दंडात्मक कारवाईची प्रक्रिया सुरू असल्याची माहिती मत्स्य विभागाकडून प्राप्त झाली आहे. दरम्यान, नौकेवरील सुमारे ६ ते ७ लाख रु. किमतीची एलईडी यंत्रणा तसेच मासळी जप्त करण्यात आली.रविवार, ३० मार्च रोजी रात्री मत्स्यव्यवसाय विभागाचे अंमलबजावणी अधिकारी रवींद्र मालवणकर हे सहकाऱ्यांसह दांडी- मालवण समुद्रात नियमित गस्त घालत होते. यावेळी गोवा राज्याच्यातील एक एलईडी मासेमारी नौका ‘बलाका जेजू’ ही मालवण किल्ल्या समोर ११ मैल क्षेत्रात अनधिकृत मासेमारी करत असताना दिसून आली. सदर नौका मत्स्य विभागाने ताब्यात घेतली आहे. या नौकेवर तांडेल सह ३० खलाशी होते. ताब्यात घेतलेली नौका जप्त करून सर्जेकोट बंदरात आणण्यात आली आहे. त्यावरील मासळीचा लिलाव करण्याची कार्यवाही सुरू होती. वागटी, सुरमई, बांगडा आदी प्रकारचे मासे या नौकेवर आहेत. नौकेवर असणारे लाईट व लाईट पुरवणारी उपकरणे जप्त करून ती सहा. आयुक्त मत्स्यव्यवसाय कार्यालयात ठेवण्यात आली आहेत. अंदाजे ६ ते ७ लाख रुपयांची लाईट, जनरेटर व इतर सामग्री जप्त करण्यात आली आहे. महाराष्ट्र सागरी मासेमारी नियमन अधिनियम १९८१ व सुधारणा अधिनियम २०२१ अंतर्गत ही कारवाई करण्यात आली आहे. मत्स्यव्यवसाय विभागाचे अंमलबजावणी अधिकारी रवींद्र मालवणकर यांनी पोलिस कर्मचारी पाटोळे तसेच सागरी सुरक्षा पर्यवेक्षक व सागरी सुरक्षा रक्षक यांच्या सहकार्याने ही कारवाई केली आहे. अंमलबजावणी अधिकारी यांनी प्रतिवेदन दाखल केल्यानंतर नौकेबाबत सुनावणी सहा. आयुक्त मत्स्यव्यवसाय, सिंधुदुर्ग यांचे कोर्टात ठेवण्यात येणार आहे.
राज्याचे मत्स्यव्यवसाय व बंदरे विकासमंत्री तथा सिंधुदुर्गचे पालकमंत्री नितेश राणे यांनी मत्स्य खात्याचा पदभार घेतल्यानंतर अवघ्या तीन महिन्यात अनधिकृत एलईडी लाईट नौकांवर धडक कारवाईचा धडाका लावला आहे. गेल्या अनेक वर्षातील कारवाई पाहता गेल्या तीन महिन्यात रेकॉर्डब्रेक कारवाई मंत्री राणे यांच्या नेतृत्वात मत्स्य विभागाने केली आहे. सोबतच आ. नीलेश राणे यांनीही अनधिकृत एलईडी लाईट व परराज्यातील हायस्पीड नौकांवर धडक कारवाईबाबत विधीमंडळात आक्रमक भूमिका वेळोवेळी मांडली. तसेच मत्स्य अधिकारी वर्गालाही कठोर कारवाईबाबत सूचना दिल्या आहेत. त्यानुसार मत्स्य विभागाकडून कारवाईचा धडाका सुरू आहे.
