कुडाळ प्रतिनिधी
कुडाळ पाट तिठा (श्री माऊली मंदिर नजिक) येथे डंपर व मोटारसायकल यांच्यात झालेल्या अपघातातील संशयित वैभव मांजरेकर (रा. हुमरमळा करमळीवाडी) आणि डंपर चालक शैलेश कुमार सिंग यांना कुडाळ येथील सह दिवानी न्यायालयाने न्यायालयीन कोठडी दिल्यानंतर १५ हजार रुपयांच्या जामिनावर मुक्तता केली. तर अल्पवयीन युवकाला सावंतवाडी येथील बाल न्यायालय मंडळात हजर केले असता त्या अल्पवयीन युवकाला परिक्षेत बसण्याची मुभा देण्यात आली. त्यानुसार त्या युवकाने सोमवारी दहावीचा पेपर दिला.पाट तिठा येथे झालेल्या अपघातात पाट हायस्कूलची दहावीतील विद्यार्थीनी मनस्वी सुरेश मेतर (वय १६, रा. निवती मेढा, ता. वेंगुर्ले) हिचा डंपर खाली सापडून जागीच मृत्यू झाला होता. या अपघातात कारणीभूत ठरल्याप्रकरणी अल्पवयीन मोटारसायकलस्वार त्याचे वडील वैभव मांजरेकर व डंपर चालक शैलेश कुमार सिंग अशा तिघांवर निवती पोलीस ठाण्यात गुन्हा दाखल करण्यात आला होता. त्यामुळे संशयित दोन आरोपींना अटक करून कुडाळ येथील न्यायालयात हजर केले असता दोन्ही आरोपींना न्यायालयीन कोठडी देऊन जामीन मंजूर करण्यात आल्याचे निवती पोलिसांनी सांगितले. डंपर चालकाच्या वतीने अॅड. पंकज आपटे यांनी तर श्री. मांजरेकर यांच्या वतीने अॅड. राजीव बिले यांनी काम पाहिले.
