कवठी – अन्नशांतवाडी येथील संदीप ऊर्फ बाळा दामोदर करलकर यांच्या खूनप्रकरणी पोलिसांनी तीन संशयितांमधील बाग कामगार श्यामसुंदर प्रभाकर वाडयेकर (रा. कवठी-बांदेकरवाडी) याला शुक्रवारी ताब्यात घेतले; तर या संदीप करलकर प्रकरणातील दोघेजण फरार आहेत.
दरम्यान, शनिवारी श्यामसुंदरला कुडाळ न्यायालयाने ४ दिवसांची पोलिस कोठडी सुनावली. संदीप करलकरने संशयिताच्या वडिलांना शिवीगाळ केली होती. याचा जाब विचारण्यासाठी संशयित त्याच्या घरी गेले असता, झालेल्या झटापटीत संदीप गंभीर जखमी झाला. यातच याचा मृत्यू झाल्याचे सांगण्यात आले. फरार असलेल्यांना लवकरच जेरबंद करू, असा विश्वास
पोलिस अधिकारी भीमसेन गायकवाड यांनी व्यक्त केला. कवठी अन्नशांतवाडीत संशयित श्यामसुंदर प्रभाकर वाडयेकर हा बुधवार, २६ फेब्रुवारी रोजी सकाळी अण्णा नामक एका बागायतदारांच्या बागेत काम करत होता. यावेळी बाग मालकही त्याच्या समवेत होता. या दरम्यान गावातीलच संदीप उर्फ बाळा दामोदर करलकर बागेतील काजू चोरत होता, म्हणून श्यामसुंदरने त्याला हटकले असता दोघांमध्ये बाचाबाची होऊन धक्काबुक्की झाली. हा वाद वाढताच मालकाने दोघांची समजूत घालून भांडण थांबवले. नंतर संदीपने अण्णा व श्यामसुंदरवर दगड भिरकावला, आणि तुम्हाला सोडणार नाही, अशी धमकी दिली. हा प्रकार अण्णा आणि श्यामसुंदर यांनी घरी सांगितला. याचा राग धरून अण्णांची मुले रामचंद्र दत्ताराम करलकर, शैलेश दत्ताराम कलरकर हे श्यामसुंदरसोबत गुरुवारी सकाळी काजू बागेत गेले. संदीप काजू चोरण्यासाठी पुन्हा बागेत येतो काय, याची वाट पाहिली; पण संदीप बागेत आला नसल्याने तिघेही अन्नशांतवाडी येथील त्याच्या घरी गेले. यावेळी संदीप श्यामसुंदरशी गोड बोलला, तुला खायला पान आणतो असे सांगून तो घरात गेला. घरातून बाहेर येताना त्याने चक्क लाकडी दांडा आणला. यावेळी संदीप आणि श्यामसुंदर तसेच रामचंद्र आणि शैलेश करलकर या तिघांत झटापट झाली. या झटापटीत संदीपच्या हातातील दांडा तिघांनी काढून घेतला. यावेळी संदीपने माफी मागितली. पण झालेल्या झटापटीत संदीपच्या मानेवर दांडा बसला. यामुळे मणका तुटला व झालेल्या रक्तस्त्रावात त्याचा घरीच मृत्यू झाला. याची माहिती मिळताच पोलिसांनी शुक्रवारी सकाळी घटनास्थळी धाव घेऊन पंचनामा केला. खून असल्याचे चौकशीत स्पष्ट झाल्याने त्या दृष्टीने तपास सुरू केला. आणि अवघ्या काही तासात श्यामसुंदरला अटक केली. या कामगाराने सर्व घटनाक्रम सांगितला. मात्र झटापटी दरम्यान संदीप जीवंत होता, असे त्याने पोलिस जबाबात सांगितले. पंचनामा पूर्ण झाल्यानंतर संदीपच्या मृतदेहाची कुडाळ येथील शवागृहात उत्तरीय तपासणी करण्यात आली. शनिवारी कवठी- अन्नशांतवाडी येथील स्मशानभूमीत अंत्यसंस्कार करण्यात आले. निवती पोलिस ठाण्याचे भीमसेन गायकवाड पुढील तपास करत आहेत.
संशयितास ४ दिवसांची पोलिस कोठडी : कामगार श्यामसुंदरला पोलिसांनी शुक्रवारी सायंकाळी अटक केली. शनिवारी कुडाळ न्यायालयाने त्याला ४ दिवस पोलीस कोठडी सुनावली. या खून प्रकरणात आरोपी समवेत अन्य कोणी होते का? मारहाणीच्या वेळचा दांडा, कपडे ताब्यात घेण्यासाठी संशयिताला ५ दिवसांची पोलीस कोठडी मिळावी, अशी मागणी अॅड. मिरजे यांनी पोलिसांच्यावतीने केली तर आरोपीच्यावतीने सरकारी वकील अॅड. बिले यांनी बाजू मांडली.
