💐 आरोग्य कर्मचाऱ्यांचा प्रश्न मार्गी; संघटनेच्या पदाधिकाऱ्यांनी घेतली पालकमंत्री नितेश राणेंची भेट

कणकवली : राज्यातील आरोग्य विभागात १० वर्षे किंवा त्यापेक्षा अधिक काळ सेवा बजावणाऱ्या १५,०१० अधिकारी व कर्मचाऱ्यांचे अधिसंख्य पदावर एक वेळची विशेष बाब म्हणून समायोजन करण्याचा महत्त्वपूर्ण निर्णय घेण्यात आला आहे. या निर्णयाबद्दल राष्ट्रीय आरोग्य अभियान अधिकारी व कर्मचारी संघटना, सिंधुदुर्ग यांच्या पदाधिकाऱ्यांनी मंत्री मत्यव्यवसाय व बंदरे, महाराष्ट्र राज्य पालकमंत्री नितेश राणे यांची भेट घेऊन आभार व्यक्त केले.
मुख्यमंत्री श्री.देवेंद्रजी फडणवीस यांच्या नेतृत्वाखाली आणि खासदार श्री.नारायण राणे साहेबांच्या संकल्पनेतून तसेच आरोग्यमंत्री श्री.प्रकाश आबिटकर यांच्या प्रयत्नांनी घेण्यात आलेल्या या निर्णयामुळे सिंधुदुर्ग जिल्ह्यातील सुमारे २३० कर्मचाऱ्यांचे आरोग्य विभागात समायोजन होणार असून, यामुळे कर्मचाऱ्यांना मोठा दिलासा मिळण्याबरोबरच जिल्ह्यातील आरोग्य यंत्रणा अधिक सक्षम आणि बळकट होण्यास निश्चितच मदत होणार आहे.
यावेळी सिंधुदुर्ग जिल्हा परिषदेचे मुख्य कार्यकारी अधिकारी श्री.रवींद्र खेबूडकर, संघटनेचे अध्यक्ष हेमदिप पाताडे, अजित सावंत, रश्मी सोहनी, स्वाती जळवी, क्रांती तोरसकर,सागर चव्हाण, अंकिता तेली, दीपक रहाटे, आदिती चव्हाण, प्रसाद यादव, शारदा तावडे, नेहा अनवकर आदी उपस्थित होते.