🏗️ नांदगाव-वाघेरी मार्केट यार्डला पालकमंत्री नितेश राणेंची भेट; कामाचा घेतला आढावा

कणकवली : सिंधुदुर्ग कृषी उत्पन्न बाजार समितीच्या नांदगाव वाघेरी येथे नव्याने उभारण्यात येत असलेल्या आधुनिक मार्केटयार्डला पालकमंत्री तथा मत्स्यव्यवसाय व बंदरे विकासमंत्री नितेश राणे यांनी भेट देऊन कामकाजाचा आढावा घेतला.
यावेळी बाजार समितीचे सभापती तुळशीदास रावराणे तसेच संबंधित अधिकारी उपस्थित होते. मार्केट यार्डच्या उर्वरित बांधकामाची सद्यस्थिती, आवश्यक निधी, पुढील कामाचे नियोजन याबाबत पालकमंत्र्यांनी सभापती व अधिकाऱ्यांशी चर्चा केली. मार्केट यार्डचे उर्वरित बांधकाम निर्धारित कालावधीत आणि गुणवत्तापूर्ण पद्धतीने पूर्ण करण्यासाठी आवश्यक ती कार्यवाही करण्याच्या सूचना त्यांनी संबंधितांना दिल्या. शेतकरी, व्यापारी आणि कृषी पणनाशी संबंधित सर्व घटकांच्या हितासाठी हे आधुनिक मार्केटयार्ड कार्यान्वित होणे गरजेचे असल्याचे सांगत, सर्वांनी समन्वयाने काम करून हा प्रकल्प वेळेत पूर्ण करण्याचे आवाहनही पालकमंत्री नितेश राणे यांनी केले.