🚌 सिंधुदुर्ग ते बेंगळुरू थेट एसटीची मागणी; प्रवाशांना मिळणार का मोठा दिलासा?

सिंधुदुर्ग जिल्ह्यातून कर्नाटकची राजधानी बेंगळूरू येथे जाणाऱ्या शेकडो प्रवाशांची होत असलेली गैरसोय लक्षात घेऊन सावंतवाडी-आंबोली-बेळगावमार्ग बेंगळुरूसाठी थेट आंतरराज्य एसटी सेवा तातडीने सुरू करण्याची मागणी कळणे येथील संदेश विश्वास देसाई यांनी सावंतवाडी एसटी आगार व्यवस्थापकांना निवेदन सादर करून केली आहे. ही सेवा सुरू झाल्यास विद्यार्थी, नोकरदार, व्यावसायिक आणि पर्यटकांना मोठा दिलासा मिळेल. तसेच एसटी महामंडळाच्या उत्पन्नातही भर पडेल, असे त्यांनी निवेदनात नमूद केले आहे.
सिंधुदुर्ग जिल्ह्यातून दररोज शेकडो नागरिक नोकरी, शिक्षण, व्यवसाय तसेच पर्यटनासाठी बेंगळुरूकडे प्रवास करतात. मात्र, सध्या सावंतवाडीसह जिल्ह्यातील कोणत्याही एसटी आगारातून बेंगळुरूसाठी थेट बससेवा उपलब्ध नाही. परिणामी प्रवाशांना बेळगाव, गोवा-पणजी किंवा मडगाव येथे जाऊन दुसऱ्या बसचा आधार घ्यावा लागतो. त्यामुळे वेळ, पैसा, श्रम यांचा अतिरिक्त भुर्दंड सहन करावा लागत असून विद्यार्थी, महिला, ज्येष्ठ नागरिकांची गैरसोय होत आहे. या पार्श्वभूमीवर सावंतवाडी आगारातून सायंकाळी वस्तीची सावंतवाडी-आंबोली-बेळगाव-बेंगळूरू अशी नियमित आंतरराज्य एसटी फेरी सुरू करावी, अशी मागणी संदेश देसाई यांनी केली आहे. या मार्गावर प्रवाशांची संख्या लक्षणीय असल्याने ही सेवा आर्थिकदृष्ट्याही एसटी महामंडळासाठी फायदेशीर ठरेल, असा विश्वास त्यांनी व्यक्त केला आहे.