मालवण : मालवण तालुक्यातील देवली माळरान परिसरात गव्यांच्या कळपाचे दर्शन झाल्याने परिसरातील ग्रामस्थांमध्ये भीतीचे वातावरण निर्माण झाले आहे. गेल्या काही दिवसांपासून या भागात गवारेडे वावरत असल्याची चर्चा होती. मात्र, आता एकाचवेळी गव्यांचा कळप दिसून आल्याने नागरिकांनी सावधगिरी बाळगण्यास सुरुवात केली आहे.
देवली माळरान परिसर हा शेती, बागायती आणि मानवी वस्तीला लागून असल्याने शेतकरी, मजूर तसेच सकाळ-संध्याकाळ फिरणाऱ्या नागरिकांमध्ये चिंतेचे वातावरण आहे. त्यामुळे वन विभागाने या परिसरात तातडीने पाहणी करून गव्यांच्या हालचालींवर लक्ष ठेवावे तसेच नागरिकांना योग्य मार्गदर्शन करावे, अशी मागणी ग्रामस्थांकडून होत आहे.
