महाराष्ट्रातील नगरपरिषद व नगरपंचायत निवडणुकीसंदर्भात राज्य निवडणूक आयोगाने महत्त्वाचा निर्णय घेतला असून प्रचाराची अंतिम मुदत वाढवण्यात आली आहे. २ डिसेंबर रोजी होणाऱ्या मतदानापूर्वी उमेदवारांना आता १ डिसेंबर रोजी रात्री १० वाजेपर्यंत जाहीर प्रचार करता येणार आहे. पूर्वी ही मर्यादा ३० नोव्हेंबरपर्यंत होती.
राज्य निवडणूक आयोगाने सुधारित आदेश जारी करताना स्पष्ट केले की १ डिसेंबर रात्री १० नंतर कोणत्याही प्रकारचे जाहीर सभांचे आयोजन, मोर्चे, रॅली, ध्वनिक्षेपकांचा वापर, तसेच निवडणूक प्रचाराशी संबंधित जाहिराती, प्रसिध्दी किंवा प्रसारण पूर्णपणे बंद राहील.
या निर्णयामुळे अनेक स्थानिक स्वराज्य संस्थांच्या निवडणुकीतील वातावरणात आणखी जोश निर्माण झाला असून उमेदवारांकडून वाढीव वेळेचा अधिकाधिक फायदा घेत मतदारांपर्यंत पोहोचण्याचा प्रयत्न सुरू आहे. आयोगाने मात्र आचारसंहितेचे काटेकोर पालन करावे, अशा सूचना सर्व संबंधित संस्था, उमेदवार व पक्षकार्यकर्त्यांना दिल्या आहेत.
