अर्ज माघारीनंतर कितीजणांना मिळणार दिलासा आणि कितींजणाची वाढणार डोकेदुखी ?
सिंधुदुर्ग : नगरपालिका निवडणुकांच्या तोंडावर आज उमेदवारी अर्ज मागे घेण्याचा शेवटचा दिवस असल्याने जिल्ह्यातील राजकीय वातावरण तापले आहे. कोण उमेदवारी माघार घेणार आणि कोण ठाम उभा राहणार, याबाबतचं चित्र काही तासांत स्पष्ट होणार आहे.
पक्षनिष्ठा आणि गटराजकारणाच्या ओढ्यात काही जणांनी अजूनही माघार घेतलेली नाही. त्यामुळे बंडखोरांची संख्या वाढण्याची शक्यता असून याचीच नेत्यांना मोठी चिंता आहे. अपक्ष म्हणून काही उमेदवार रिंगणात उभे राहण्याच्या तयारीत आहेत. त्यांना थोपवण्यासाठी पक्षनेत्यांनी गेल्या दोन दिवसांत अपक्ष संभाव्य उमेदवारांच्या घरचे उंबरठे अक्षरशः झिजवले आहेत.
लढणार की माघार घेणार? या प्रश्नाचे उत्तर मिळण्याची सर्वांची उत्सुकता शिगेला पोहोचली आहे. माघारीची अंतिम मुदत संपताच समीकरणे कोणत्या दिशेने वळतात हे स्पष्ट होईल. सिंधुदुर्गच्या या राजकीय घडामोडीकडे राज्याचं लक्ष लागलं असून, आगामी नगरपरिषदांच्या निकालावर याचा थेट परिणाम होणार असल्याचं जाणकारांचे मत आहे. कोकणशाही सिंधुदुर्ग
