सिंधुदुर्ग : कोकणात पुन्हा एकदा राजकीय वादळ उठण्याची चिन्हं स्पष्ट झाली आहेत. स्थानिक स्वराज्य संस्थांच्या २७ निवडणुकींच्या पार्श्वभूमीवर आज उमेदवारी अर्ज दाखल करण्याचा शेवटचा दिवस असून, राजकीय पक्षांनी विरोधकांना आवरणे आणि मित्रपक्षांना सावरण्यासाठी तारेवरची कसरत सुरू केली आहे.
पालघर (४), रायगड (१०), रत्नागिरी (७), सिंधुदुर्ग (४) आणि ठाणे (२) अशा विभागांत एकूण २७ नगरपालिकांमध्ये उष्ण प्रचार मोहीम सुरू होण्याच्या मार्गावर आहे. भाजप प्रदेशाध्यक्ष रविंद्र चव्हाण , नितेश राणे आणि महायुतीतून राष्ट्रवादीचे सुनील तटकरे यांच्या मुत्सद्दी भूमिकेतून हा सामना अधिकच रोचक बनला असून, शिवसेना (शिंदे गट) नेही आपले बळ दाखवण्यासाठी उदय सामंत, योगेश कदम, भरत गोगावले आणि आमदार निलेश राणे यांच्या नेतृत्वाखाली मोठा मोर्चा उघडला आहे. याउलट शिवसेना (उद्धव गट) भास्कर जाधव, बाळ माने आणि वैभव नाईक यांच्या आधारे ही लढत लढताना दिसते आहे.
शिवसेनेच्या दुफळीमुळे बदललेली गणितं
एकेकाळी या क्षेत्रात शिवसेनेचा दबदबा होता, मात्र आता पक्षातील झालेल्या फुटीमुळे समीकरण पूर्णपणे बदलली आहेत. स्वबळावर लढण्याची घोषणा करणाऱ्या दोन्ही शिवसेना गटांना आता कोकणातील निष्ठावान मतदारांचा कौल मिळवण्यासाठी नवीन रणनीती आखावी लागणार आहे. या पार्श्वभूमीवर सत्ता स्थिर करण्यासाठी महायुतीतील भाजप-शिवसेना (शिंदे) आणि राष्ट्रवादीचा चांगला समन्वय महत्त्वाचा ठरणार आहे.
कोकणातील प्रत्येक नगरपरिषदेचा अभिमानाचा आणि प्रतिष्ठेचा प्रश्न
रायगडमधील अलिबाग, कर्जत, खोपोली, महाड, माथेरान, मुरुड-जंजिरा, पेण, रोहा, श्रीवर्धन आणि उरण यांच्या निकालावरून महायुतीचा कोकणातील प्रभाव दिसेल, तर रत्नागिरीतील चिपळूण, देवरुख, गुहागर, खेड, लांजा, राजापूर आणि रत्नागिरी नगरपालिका याही निवडणुका प्रत्येक पक्षासाठी प्रतिष्ठेच्या ठरणार आहेत. सिंधुदुर्गात कणकवली, मालवण, सावंतवाडी आणि वेंगुर्ला नगरपालिकांवर कोणाचा झेंडा फडकतो, याकडे कोकणासह राज्यभरातली राजकीय नजर असेल. ठाणे जिल्ह्यात अंबरनाथ आणि कुळगाव-बदलापूर या दोनही ठिकाणी निवडणूक निकाल ठाण्याचे राजकीय गणित ठरवतील.
निवडणूक प्रक्रिया आणि तारखा
यापूर्वी जाहीर झालेल्या कार्यक्रमानुसार,
उमेदवारी दाखल करण्याची अंतिम तारीख: १७ नोव्हेंबर २०२५
नामनिर्देशनपत्रांची छाननी: १८ नोव्हेंबर २०२५
माघार: २१ नोव्हेंबर (अपील नसलेल्या ठिकाणी); २५ नोव्हेंबर (अपील असलेल्या ठिकाणी)
मतदान: २ डिसेंबर २०२५ (सकाळी ७.३० ते सायं. ५.३०)
मतमोजणी: ३ डिसेंबर २०२५ (सकाळी १० वाजल्यापासून)
या निवडणुकीचा निकाल फक्त कोकणापुरता मर्यादित नसून, मुंबई आणि महाराष्ट्राच्या भावी राजकीय समीकरणांना दिशा देणारा ठरेल. ३ डिसेंबरला उडणारा गुलाल केवळ विजेत्यांची घोषणा करणार नाही, तर पुढील विधानसभा आणि लोकसभा निवडणुकीची पूर्वतयारी ठरणार आहे.
अस्सल कोकणी राजकारणाची रंगलेली ही लढत आता मतदारांच्या आशीर्वादावर अवलंबून आहे. जागा जरी नगरपरिषदेच्या असल्या, तरी लढत ही सत्तेच्या केंद्रावरचा प्रभाव दाखवणारी असणार आहे. कोकणशाही सिंधुदुर्ग
