मालवण : मालवण तालुक्यातील वराड-सावरवाड येथील दोन बंद घरे मध्यरात्री चोरट्यांनी फोडल्याची घटना घडली. मात्र, या दोन्ही घरफोड्यांमध्ये चोरट्यांच्या हाती काही लागले नाही.
मिळालेल्या माहितीनुसार, वराड सावरवाड येथील श्री लक्ष्मीनारायण मंदिरानजीक गणपत महादेव रावले यांचे घर असून रावले कुटुंबीय मुंबईला स्थायिक असल्याने हे घर बंद असते. या घराचे केअरटेकर विवेक मांजरेकर यांना गुरुवारी सकाळी घराच्या पुढील दरवाजाचे कडी-कुलूप तोडलेल्या अवस्थेत व दरवाजा उघडा असल्याचे दिसून आले. पोलिसांना माहिती दिल्यावर पोलिसांनी तपासणी केली. मात्र, कोणताही मुद्देमाल चोरीस न गेल्याचे समोर आले. याच दरम्यान सावरवाड येथीलच सिद्धिविनायक मंदिरानजीक संजय अनंत पारकर यांच्या मालकीच्या बंगल्यातही घरफोडी झाल्याचे केअरटेकर श्री. फाटक यांना दिसून आले. पोलिसांनी तेथेही पाहणी केली. कोणताही मुद्देमाल चोरीस गेला नसल्याचे सांगण्यात आले. तपासासाठी फॉरेन्सिक विभाग, श्वान पथकाला पाचारण करण्यात आले होते. यावेळी उपविभागीय पोलीस अधिकारी आढाव, स्थानिक गुन्हा अन्वेषण विभागाचे पो. निरीक्षक प्रवीण कोल्हे, मालवणचे पो. निरीक्षक मारुती जगताप, पो. उपनिरीक्षक खाडे आदी उपस्थित होते. कोकणशाही मालवण
