सावंतवाडी : भांडुप येथील भांडुप नागरिक कोकण प्रवासी सेवा समितीचे अध्यक्ष श्री सुभाष राणे आणि श्री उदय चोथे यांच्या पुढाकाराने, सावंतवाडी स्टेशन मास्तर यांना एक निवेदन सादर करण्यात आले. यामध्ये कोकणातील सणासाठी भांडुप येथील जवळपास १० ते २० हजार कोकणवासीय कुटुंबे गावी जात असल्याने, त्यांच्या सोयीसाठी भांडुप स्थानकातून नवीन भांडुप ते सावंतवाडी दरम्यान रेल्वे सेवा देण्याची मागणी करण्यात आली आहे.
मुंबईतील भांडुप या शहराला मिनी कोंकण देखील म्हणतात कारण येथे लाखो कोकणी वस्ती राहते, त्यासाठी त्यांचाकरिता स्लीपर कोचच्या ३०% जागा आणि सिटिंग कोचच्या १०% जागा राखीव ठेवून विशेष आरक्षण सुविधा उपलब्ध करावी.
सावंतवाडी, कुडाळ, कणकवली, रत्नागिरी, चिपळूण, खेड, दादर, तसेच दिवा, पनवेल, रोहा इत्यादी स्थानकांवरून प्रवास करणाऱ्या प्रवाशांचा यात समावेश आहे.
भांडुप हे रेल्वेचे टर्मिनस स्टेशन नसले तरी, येथील सुमारे २० हजार कुटुंबे गावी जात असल्याने त्यांना दादर, कुर्ला टर्मिनस किंवा सीएसएमटी पर्यंत प्रवास करून ट्रेन पकडावी लागते. या त्रासातून मुक्तता मिळावी म्हणून रेल्वेने भांडुपला विशेष स्थानकाचा दर्जा देऊन आरक्षण उपलब्ध करावे, असे निवेदनात स्पष्ट नमूद केले आहे.
भांडुप ते सावंतवाडी रेल्वे सेवेसाठी पुन्हा टर्मिनस सुविधेची नितांत आवश्यकता आहे त्यासाठी सावंतवाडी येथे कोचिंग टर्मिनसची सुविधा पूर्ण व्हावी.
या मागणीसंदर्भात या संघटनेचे अध्यक्ष श्री सुभाष राणे आणि श्री उदय चोथे यांनी अन्य प्रवासी प्रतिनिधींसोबत सावंतवाडी स्टेशन मास्तर यांची भेट घेऊन निवेदन सादर केले आहे.
रेल्वे प्रशासनाने या मागणीचा गांभीर्याने विचार करून निदान सणासुदीच्या काळात तरी कोकणात जाणाऱ्या चाकरमान्यांना दिलासा द्यावा, अशी अपेक्षा व्यक्त होत आहे. कोकणशाही सावंतवाडी
