कोल्हापुरात ताराबाई पार्कातील हॉटेल वुडलँडसह परिसरात धुमाकूळ घालणाऱ्या बिबट्याला वनविभागाच्या पथकानं पकडलं. दोन तासात वनविभागाच्या पथकानं जाळी टाकून त्याला अलगद पकडल्याची माहिती वन अधिकाऱ्यांनी दिली. बिबट्याने हॉटेलमध्ये घुसून दोघांवर हल्ला केला. यात दोघे जखमी झाले आहेत. यानंतर बिबट्या महावितरणच्या कार्यालयाच्या परिसरात होता. ड्रेनेजमध्येही बिबट्या घुसला होता. पण त्याला अखेर पकडण्यात यश आलंय.
याबाबत मिळालेली माहिती अशी की, वुडलैंड हॉटेलमध्ये घुसल्यानंतर बिबट्याकडून कर्मचाऱ्यावर हल्ला करण्यात आला. यानंतर पोलीस घटनास्थळी गेले असताना पोलिसांवर हल्ला केला. बिबट्या शहरात घुसल्याची बातमी पसरताच परिसरात बघ्यांनी मोठी गर्दी केली होती.
वन विभागाला बिबट्या ताराबाई पार्कात घुसल्याची माहिती मिळताच वन विभागाचे कर्मचारी ट्रॅक्युलर गन आणि पिंजरा घेऊन घटनास्थळी पोहोचले. बिबट्याला पकडण्यासाठी वनविभागाचे कर्मचारी आणि पोलीस २ तास धडपडत होते.
बिबट्या ड्रेनेजमध्ये गेला असताना वनविभागाचे कर्मचारी आणि पोलिसांनी धाडस करून नेट त्यावर टाकलं. बिबट्याला पकडण्यासाठी गेलेल्या वनविभागाच्या कर्मचाऱ्यांच्या हातात फक्त काठी होती. जाळं ड्रेनेजवर टाकल्यानंतर बिबट्या अचानक बाहेर आला आणि अलगद जाळ्यात फसला. यानंतर वनविभागाच्या कर्मचाऱ्यांनी त्याला पकडून पिंजऱ्यात बंद केलं. वनविभागाच्या कारवाईचा थरार समोर आला आहे. वनविभागाच्या धाडसी कामगिरीचं कौतुक केलं जातंय. कोकणशाही कोल्हापूर
