देवगड : देवगड नांदगाव या मुख्य मार्गावरील शिरगाव बाजारपेठ येथे रस्ता खचल्याने चिरे वाहतूक करणाऱ्या ट्रकला अपघात झाला. रस्ता खचल्याने ट्रकची डावी बाजू खड्ड्यात कंलडली असून ट्रकच्या मागील चाकाचा भाग अर्धा या खड्ड्यात रुतला आहे.
त्यामुळे शेजारीच असलेल्या चिरे व्यवसायिक कार्यालयांवर हा ट्रक कलंड्याची शक्यता आहे. मात्र शिरगाव ग्रामस्थांनी तात्काळ सावधानता दाखवत लोखंडी जॅक व लाकडी बारांच्या टेकूमुळे पुढील धोका तात्पुरता टळला आहे.
कराड हेळवाक येथील विकास बबन महाजन यांच्या मालकीचा एम एच 50 6197 या क्रमांकाचा ट्रक घेऊन चालक दिलीप भोगले कळेमल्हार पेठ कराड हे लिंगडाळ येथून चिरे घेऊन कोल्हापूरच्या दिशेने जात होते. ही वाहतूक करत असताना शिरगाव बाजारपेठ येथे एसटीला साईड देण्यासाठी गाडी उभी केली असता अचानक रस्ता खचल्याने ट्रकचे मागील चाक दोनफुट रुतल्यामुळे चिरे वाहतूक करणारा ओव्हरलोड ट्रक डाव्या बाजूला कलंडला.
ट्रक खचल्याने ट्रक मधील असलेल्या सर्व सर्वांनी बाहेर उड्या मारल्या. मात्र हा ट्रॅक चिरे व्यवसायिक साटम यांच्या कार्यालयावर कलंडल्याची शक्यता होती पण तेथील जागृत नागरिकांनी तत्परता दाखविल्याने तूर्तास हा धोका टळला आहे.
अपघाताची माहिती समजतात सामाजिक कार्यकर्ते संभाजी साटम तात्काळ घटना स्थळी दाखल झाले.त्वरीत त्यांनी पोलिसांना बोलावून घेतले. देवगड पोलीस घटनास्थळी दाखल होत त्यांनी ड्रायव्हर जवळ कागदपत्राची चौकशी केली व दुसरी गाडी बोलावून दुसऱ्या गाडीत चिरे हलविण्यास सागितले.मात्र संबंधित प्रशासकीय यंत्रणेकडून असमाधानकारक उत्तरे मिळत असल्याने ग्रामस्थांचा संताप अनावर झाला.
देवगड तालुक्याचे शिरगाव हे मेन जंक्शन असून या ठिकाणी मोठ्या प्रमाणात वाहतुकीची रहदारी असते. वारंवार तक्रार करून देखील याची कोणतीही दखल घेतली जात नाही.फायबर ऑप्टिकल केबल टाकताना रस्त्याच्या खालून हायड्रोलिक मशीनच्या सहाय्याने होल मारून केबल टाकण्यात आली त्याच्यामुळे मुख्य रस्त्यात पोकळी निर्माण झालेली आहे.
यापूर्वीही अशीच घटना शिरगाव बौद्धवाडी येथील प्रवेशद्वाराजवळ तसेच शिरगाव राकसघाटी येथे ही घडलेल्या आहेत. हा धोका कायम उद्भवत आहे याची माहिती संबंधित प्रशासकीय विभागाला दिलेली असताना पूर्णतः डोळे झाक होत आहे हे दुर्दैव. कोकणशाही देवगड
