सिंधुदुर्ग जिल्ह्यात भाजपची स्थानिक स्वराज्य संस्थासाठी जोरदार तयारी. प्रदेश कार्यालयातून निवडणूक प्रमुख प्रमोद जठार तर निवडणूक प्रभारी म्हणून पालकमंत्री नितेश राणे यांच्यावर जबाबदारी
आगामी स्थानिक स्वराज्य संस्था निवडणूक २०२५ साठी भारतीय जनता पार्टीने जिल्हानिहाय निवडणूक प्रमुख आणि निवडणूक प्रभारींची नियुक्ती केली असून, त्याची अधिकृत यादी ई येथील पक्षाच्या प्रदेश कार्यालयातून जाहीर करण्यात आली.
भाजपने राज्यातील एकूण ३५ जिल्ह्यांमध्ये संघटनात्मक पातळीवर तयारी मजबूत करत ही जबाबदारी अनुभवी आणि रणनीतीत पारंगत नेतृत्वाला दिली आहे. पक्षाच्या विजयासाठी आवश्यक आखणी, निवडणूक नियोजन, तांत्रिक मार्गदर्शन आणि स्थानिक संघटन समन्वय या सर्वांचा भार नियुक्त प्रमुख आणि प्रभारी यांच्यावर असेल.
सिंधुदुर्ग जिल्ह्यासाठी निवडणूक प्रमुख म्हणून माजी आमदार प्रमोद जठार तर निवडणूक प्रभारी : जिल्ह्याचे पालकमंत्री नाम. नितेश राणे यांची नियुक्ती करण्यात आली आहे. दोन्ही नेत्यांचे संघटन कौशल्य, स्थानिक पातळीवरील दांडगा संपर्क आणि निवडणूक व्यवस्थापनातील अनुभव लक्षात घेऊन ही महत्त्वाची जबाबदारी सोपवण्यात आली असल्याचे पक्ष सूत्रांकडून समजते.
सावंतवाडीत विशाल परब यांच्या जनसंपर्क कार्यालयाच्या निमित्ताने स्वबळाचे रणशिंग फुंकताना स्थानिक स्वराज्य संस्थांच्या निवडणुकांकडे भाजपने विशेष लक्ष केंद्रित केले आहे. यामध्ये जिल्हानिहाय संघटन सुसज्ज करणे, बूथस्तरावर नेटवर्क मजबूत करणे , ग्रामीण तसेच शहरी भागात पक्षाची उपस्थिती बळकट करणे ही प्रक्रिया आता वेगाने सुरू झाली आहे.
दरम्यान प्रमोद जठार आणि पालकमंत्री नितेश राणे यांच्या निवडणूक प्रमुखपदाच्या या घोषणेने सिंधुदुर्गमधील भाजप कार्यकर्त्यांमध्ये नवचैतन्य आणि उत्साहाची लाट निर्माण झाली असून, पक्ष आगामी निवडणुकीसाठी शत-प्रतिशत तयारीत असल्याचे स्पष्ट संकेत मिळतात. आता प्रमोद जठार आणि नितेश राणे यांच्या नेतृत्वाखाली जिल्ह्यातील भाजपची निवडणूक मोहीम आणखी धारदार होण्याची अपेक्षा व्यक्त केली जात आहे. कोकणशाही सिंधुदुर्ग
