दापोली :
दापोली येथील डॉ. बाळासाहेब सावंत कोकण कृषी विद्यापीठाचे कुलगुरू डॉ. संजय भावे यांना संरक्षण मंत्रालयाने कर्नल कमांडट ही मानद उपाधी जाहीर केली असून भारत सरकारच्या राजपत्रामध्ये हि माहिती देण्यात आली आहे.
कुलगुरू डॉ. संजय भावे यांचे शिक्षणही कोकण कृषी विद्यापीठामध्ये झालेले असून शिक्षण घेत असताना ते राष्ट्रीय छात्र सेनेचे (एनसीसी) चे ३ वर्ष छात्र (कॅडेट) होते. तर त्यांनी १९७९ ते १९८२ या काळात सिनिअर अंडर ऑफिसर म्हणूनही काम केले आहे.म्हणूनही काम केले आहे. त्यामुळे त्यांच्या या कार्याची दखल संरक्षण मंत्रालयाने घेवून त्यांना “कर्नल कमांडट” हि मानद उपाधी जाहीर केली आहे. एप्रिल महिन्यात एनसीसीचे मुंबई येथील अतिरिक्त महासंचालक, कोल्हापूर येथील ब्रिगेडीअर तसेच बटालीअन कर्नल यांच्या उपस्थितीत एका कार्यक्रमात कुलगुरू डॉ. संजय भावे यांना हि उपाधी प्रदान करण्यात येणार आहे.हि उपाधी प्राप्त करणारे डॉ. संजय भावे हे या विद्यापीठाचे चौथे कुलगुरु असून यापूर्वी डॉ. विजय मेहता, डॉ. शंकरराव मगर व डॉ. संजय सावंत यांना हि उपाधी प्रदान करण्यात आली होती.
