कुडाळ,
ती दहावीची परीक्षा देत होती. सोमवार, दि. १७ रोजी शेवटचा भूगोलचा पेपर होता. त्यासाठी ती रविवारी हायस्कूलमध्ये क्लासला जातानाच तिच्यावर काळाने घाला घातला अन् दहावीचा शेवटचा भूगोलचा पेपर तिचा राहूनच गेला.
कुडाळ तालुक्यातील पाट तिठा (माऊली मंदिर) येथे डंपर व मोटारसायकल यांच्यात धडक होऊन झालेल्या भीषण अपघातात पाट हायस्कूलची दहावीतील विद्यार्थिनी मनस्वी सुरेश मेतर (वय २६, रा. निवती मेढा, ता. वेंगुर्ले) हिचा डंपरखाली सापडून जागीच मृत्यू झाला, तर मोटारसायकलस्वार जखमी झाला. ही घटना रविवारी सकाळी ६.४० च्या सुमारास घडली. मनस्वीच्या दुर्दैवी अपघाती मृत्यूने पाट निवती पंचक्रोशीत हळहळ व्यक्त होत आहे.
दरम्यान, या अपघाताने संतप्त झालेल्या ग्रामस्थांनी निवती पोलिस ठाण्यावर धडक देत या अपघाताला कारणीभूत ठरणाऱ्यांवर गुन्हा दाखल करावा, अशी आक्रमक भूमिका घेतली. त्यानंतर अल्पवयीन मोटारसायकलस्वार, त्याचे वडील व डंपर चालक अशा तिघांवर पोलिस ठाण्यात गुन्हा दाखल करण्यात आल्याची माहिती निवती पोलिस ठाण्यातून देण्यात आली. याबाबतची माहिती योगेश उल्हास मेतर (रा. निवती मेढा) यांनी निवती पोलिस ठाण्यात दिली. वनविभागाचे अधिकारी सुरेश मेतर यांची मुलगी मनस्वी ही एस. एल. देसाई विद्यालय पाट या हायस्कूलमध्ये दहावी इयत्तेत शिकते. ती नेहमी एसटी बसने शाळेत जात असे. सध्या दहावीची परीक्षा चालू असून सोमवारी दहावीचा शेवटचा भूगोलचा पेपर होता. या विषयाच्या जादा वर्गासाठी ती हायस्कूलमध्ये क्लाससाठी जात होती. दरम्यान हुमरमळा येथील तिच्या ओळखीतील एका मुलाने तिला म्हापण येथे आपल्या मोटारसायकलवर घेतले. यानंतर ते दोघेही पाट तिठा येथून कुंभारवाडी मार्गे पाट हायस्कूलकडे निघाले. याच मार्गावर परूळे ते कुडाळ अशी वाळू वाहतूक करणाऱ्या डंपरची मोटारसायकलची जोरदार धडक झाली. यात मोटरसायकल रस्त्यावर पडली तर मोटारसायकलस्वार व मागे बसलेली मनस्वी हे दोघेही रस्त्यावर फेकले गेले. यात मनस्वी ही दुर्दैवाने डंपरच्या मागील चाकाखाली गेली. डंपरच्या चाकाखाली सापडून तिचा जागीच मृत्यू झाला. या अपघाताची माहिती मिळताच ग्रामस्थांनी घटनास्थळी धाव घेतली. निवती पोलिस ठाण्याचे उपनिरीक्षक दिलीप शेटये, सुनील सावंत व विक्रांत लोणे यांनी लागलीच घटनास्थळी धाव घेत पंचनामा केला. जखमी मोटारसायकलस्वाराला रुग्णालयात उपचारासाठी दाखल करण्यात आले तर मयत मनस्वीचे शव कुडाळ ग्रामीण रुग्णालयात आणण्यात आले. शवविच्छेदन केल्यानंतर तिचा मृतदेह दुपारी नातेवाईकांच्या ताब्यात देण्यात आला. दरम्यान निवती व पाट पंचक्रोशी ग्रामस्थांनी आक्रमक भूमिका घेत, निवती पोलिस ठाण्यात धडक दिली. या अपघाताला कारणीभूत ठरणाऱ्यांवर तातडीने गुन्हे दाखल करून कारवाई करावी, तसेच बेदरकार डंपर वाहतुकीला आळा घालावा, अशी मागणी लावून ठरली. या अपघाताची माहिती योगेश उल्हास मेतर (रा. निवती मेढा) यांनी निवती पोलिस ठाण्यात दिली. त्यानुसार या अपघातप्रकरणी सोळा वर्षीय मोटारसायकलस्वार मुलगा, तसेच तो अज्ञान असतानाही व वाहनचालक परवाना नसतानाही त्याला गाडी चालविण्यास दिल्याने त्याचे वडील वैभव मांजरेकर (रा. हुमरमळा-करमळीवाडी) आणि डंपर चालक शैलेश कुमार सिंग अशा तिघांवर निवती पोलिस ठाण्यात गुन्हा दाखल करण्यात आल्याची माहिती सहा. पोलिस निरीक्षक भीमसेन गायकवाड यांनी दिली.मनस्वी ही सोमवारी दहावी परीक्षेचा शेवटचा पेपर देणार होती. ती अभ्यासात हुशार होती. मात्र शेवटचा पेपर सोडविण्याआधीच तिचा अपघाती मृत्यू झाला. या घटनेने मेतर कुटुंबियांवर दुःखाचा डोंगर कोसळला आहे. अपघाताची माहिती मिळताच ग्रामस्थ, नातेवाईक, शिक्षकांनी घटनास्थळी धाव घेतली. तिच्या निधनाने पाट-म्हापण-निवती पंचक्रोशीत हळहळ व्यक्त करण्यात आली
