दोडामार्ग तालुक्यात माकडताप सदृश रुग्ण सापडल्याने आरोग्य विभागात खळबळ माजली आहे. जंगली माकडांच्या उपद्रवामुळे हा ताप फैलावण्याची शक्यता वाढली आहे. ग्रामस्थांनी याबाबत जागृत राहण्याचे आवाहन आरोग्य विभागाने केले आहे. माकडतापसदृश रुग्णाची प्रकृती स्थिर असल्याचे आरोग्य विभागाकडून सांगण्यात आले आहे.
माकडताप एक गंभीर आजार आहे. रानातील गोचीडमुळे मानवाला याचा संसर्ग होतो. गोचीड मानवी शरीरावर चढल्यानंतर ती चावा घेते व त्यातून माकडताप रोगाचे विषाणू शरीरात प्रवेश करतात. शेतकऱ्यांना या आजाराचा संसर्ग होण्याची दाट शक्यता असते.
तालुक्यात २०१७ साली माकडतापाचा पहिला रुग्ण आढळला होता. त्यानंतर अनेक रुग्णांना माकड तापाची लागण झाली होती. या आजाराने काहींचा बळी देखील घेतला होता. या आजारावर मात करण्यासाठी व आटोक्यात आणण्यासाठी आरोग्य विभागाचे शर्थीचे प्रयत्न केले होते. अखेर या आजारावर प्रतिबंधात्मक लस आल्यावर आरोग्य विभागाला दिलासा मिळाला.
रुग्णाच्या प्रकृतीवर ठेवण्यासाठी आरोग्य विभागाने आवश्यक सूचना जारी केल्या होत्या. तसेच गावोवागी लसीकरणाची मोहीम राबवून आजार लागणीपासून सुरक्षा कवच दिले होते. तसेच जनजागृतीसाठी ठिकठिकाणी कॅम्प आयोजित करून माकडताप विषाणू विषयी माहिती लोकांपर्यंत पोहोचविली. या वर्षी दोडामार्ग तालुक्यात पुन्हा नव्याने माकडताप सदृश्य रुग्ण आढळल्याने आरोग्य विभागात खळबळ उडाली आहे. यावेळी, प्रशासनाने नागरिकांना काळजी घेण्याचे आवाहन केले आहे.
