देवगड
दक्षिण कोकणची ओळखल्या जाणाऱ्या काशी श्रीदेवकुणकेश्वर महाशिवरात्री यात्रोत्सवाला आजपासून सुरुवात होत आहे. २६ ते २७ फेब्रुवारी या कालावधीत ही यात्रा होत असून, गुरुवारी (दि. २७) दर्श अमावस्या महापर्वणी तीर्थस्नानाचा योग असल्याने मोठ्या प्रमाणात भाविक भक्तांचा ओघ वाढणार आहे.
यात्रेचा कालावधी दोन दिवसांचा असल्याने यावर्षी भाविकांच्या गर्दीचा उच्चांक मोठ्या प्रमाणावर पहिला मिळणार आहे . कुणकेश्वर यात्रोत्सवाची तयारी पूर्ण झाली असून महाशिवरात्री यात्रोत्सवाला आजपासून प्रारंभ झाला आहे, या ठिकाणी दोन दिवस शिवशंभोचा गजर ऐकायाला मिळणार आहे, भाविकांसाठी तीर्थक्षेत्र सज्ज झाले असून भाविकां साठी देवगड आगारातून २६ गाड्यांच नियोजन करण्यात आले आहे.
यात्रोत्सवासाठी देवस्थान ट्रस्ट व ग्रामपंचायतीकडून काटेकोर नियोजन करण्यात आले आहे. एस्टी, वीजवितरण, पोलिस, आरोग्य, आपत्ती व्यवस्थापन, दुरसंचार आदी सर्व विभागांकडून योग्य नियोजन करण्यात आले आहे. यात्रेच्या पार्श्वभूमीवर व्यापाऱ्यांनी विविध खेळण्यांचे स्टॉल देखील उभारले आहेत. रस्त्याच्या दुतर्फा विविध प्रकारची मिठाई, हॉटेल्स, मालवणी खाजा, कापड दुकाने यांनी यात्रा परिसर फुलुन गेला आहे. यावेळी यात्रेच्या ठिकाणी पारंपारिक शेती अवजारे मोठ्या प्रमाणात विक्रीस आली आहेत. तसेच कुणकेश्वरचा समुद्रकिनाराही भेल, आईस्क्रिम, इतर हॉटेल्स दुकानांनी भरून गेलेला दिसून येत आहे. पोलिसांकडून वाहतुकीचे नियोजन दरवर्षीप्रमाणे वाहतुकीचे नियोजन पोलिसांकडून करण्यात आले आहे. तारामुंबरी मिठमुंबरी पुलामुळे देवगडकडील बहुतांशी वाहतुक ही पुलावरून होणार असल्याने वाहतुक कोंडी कमी प्रमाणात होईल. तीन ठिकाणी पार्कींग व्यवस्था करण्यात आली आहे. यामध्ये तारामुंबरी मिठमुंबरी पुल मार्गावरून जाणाऱ्या वाहनांसाठी आस्मी हॉटेलनजिक, कणकवली येथून लिंगडाळमार्गे येणाऱ्या वाहनांसाठी हॉटेल शिवसागरसमोर,
आचरा मिठबांव मार्गावरून येणाऱ्या वाहनांसाठी एमटीडीसीसमोर वाळूवर पार्किंग व्यवस्था ठेवण्यात आली आहे. यात्रेतील अनुचित प्रकारावर नजर ठेवण्यासाठी पोलिसांचे टेहाळणी पथक व देवस्थान ट्रस्टच्या स्वयंसेवकांचे पथक कार्यरत आहे. त्याचप्रमाणे क्लोज सर्किट कॅमेरेही बसविण्यात आले आहेत. कुणकेश्वर भेटीसाठी १० देवस्वाऱ्या
महाशिवरात्री यात्रोत्सवानिमित्त श्री क्षेत्र कुणकेश्वर भेटीसाठी १० देवस्वाऱ्या जाणार आहेत. यामध्ये मिठबांव श्रीदेव रामेश्वर देवस्वारी ३०० वर्षांनी कुणकेश्वर भेटीसाठी जाणार आहे. तर श्री इनामदार रामेश्वर संस्थान आचरा श्री देव रामेश्वराची देवस्वारी ३९ वर्षांनी, शिरगाव श्री देवी पावणाईदेवी २२ वर्षांनी व देवगड जामसंडे गावचे ग्रामदैवत श्री दिर्बा रामेश्वर देवस्वारी १२ वर्षांनी कुणकेश्वर भेटीसाठी जाणार आहेत. याशिवाय श्री देव माधवगिरी माईण कणकवली, श्री गांगेश्वर नारींग्रे, श्री देव जैनलिंग रवळनाथ महालक्ष्मी, पावणादेवी गांगो बिडवाडी कणकवली, श्री देव गांगेश्वर बावशी बेळणे कणकवली, श्री पावणादेवी हुंबरट कणकवली, श्री गांगेश्वर पावणाई भावई दाभोळे या देवस्वाऱ्या कुणकेश्वर भेटीला जाणार.
