💧 पावसाळ्यात दूषित पाण्याचा धोका; मळेवाड आरोग्य केंद्राकडून जलशुद्धीकरणाचे प्रशिक्षण

सावंतवाडी : प्राथमिक आरोग्य केंद्र मळेवाडच्या वतीने आरोग्य सेवक, ग्रामपंचायत कर्मचारी तसेच जलसुरक्षक कर्मचाऱ्यांसाठी पाणी गुणवत्ता नियंत्रण व जलशुद्धीकरणाबाबत प्रात्यक्षिकासह प्रशिक्षण कार्यक्रम आयोजित करण्यात आला.
या प्रशिक्षणात वैद्यकीय अधिकारी डॉ. अदिती ठाकूर व आरोग्य सहाय्यक पी. आर. चव्हाण यांच्या मार्गदर्शनाखाली पाणी शुद्धीकरणाच्या विविध पद्धती, पिण्याच्या पाण्याची गुणवत्ता तपासणी, तसेच सुरक्षित पाणीपुरवठ्यासाठी घ्यावयाची काळजी याबाबत सविस्तर माहिती देण्यात आली.
सध्या पावसाळ्यात दूषित पाण्यामुळे अतिसार, गॅस्ट्रो, टायफॉईड, कावीळ, अन्य आजार यांसारख्या जलजन्य आजारांचे प्रमाण वाढण्याची शक्यता लक्षात घेता, रोगप्रतिबंधक उपाययोजनांची प्रभावी अंमलबजावणी करण्याच्या उद्देशाने हे प्रशिक्षण आयोजित करण्यात आले होते.
यावेळी मळेवाड आरोग्य केंद्र निहाय येणाऱ्या सर्व उपस्थित कर्मचाऱ्यांना प्रत्यक्ष प्रात्यक्षिकाद्वारे पाणी शुद्धीकरणाची प्रक्रिया समजावून सांगण्यात आली. तसेच नागरिकांना स्वच्छ व सुरक्षित पिण्याचे पाणी उपलब्ध करून देण्यासाठी आवश्यक दक्षता घेण्याचे आवाहन करण्यात आले.