🙏 जिल्हाधिकारी तृप्ती धोडमिसेंकडून अजितदादांना आदरांजली; प्रेरणादायी कार्याचा गौरव

सिंधुदुर्गनगरी : महाराष्ट्राचे दिवंगत माजी उपमुख्यमंत्री अजित पवार यांच्या जयंतीनिमित्त बुधवारी जिल्हाधिकारी कार्यालयातील आरमारप्रमुख मायनाक भंडारी सभागृहात जिल्हाधिकारी तृप्ती धोडमिसे यांनी अजित पवार यांच्या प्रतिमेस पुष्पहार अर्पण करून त्यांना भावपूर्ण आदरांजली वाहिली. राज्याच्या प्रशासनात त्यांनी दिलेले नेतृत्व, विकासाभिमुख दृष्टिकोन, लोकाभिमुख कार्यपद्धती आणि जनसेवेप्रती असलेली त्यांची बांधिलकी यांचे स्मरण यावेळी करण्यात आले.
धोडमिसे म्हणाल्या, प्रत्येक अधिकाऱ्याच्या कामाचे बारकाईने परीक्षण करताना चांगले काम करणाऱ्यांचे मनापासून कौतुक करणे, ही, अजितदादा यांची कार्यपद्धती होती. चांगल्या कामाला प्रोत्साहन देणे आणि गुणवत्तेची दखल घेणे, हा त्यांच्या नेतृत्वाचा महत्वाचा गुण होता. प्रशासनावर असलेली त्यांची भक्कम पकड, निर्णयक्षमता आणि कामातील स्पष्टता यामुळे विकासकामांना नेहमीच गती मिळाली. कोणतेही काम नियोजनबद्ध पद्धतीने, वेळेत आणि परिणामकारक रितीने पूर्ण व्हावे, यासाठी ते सातत्याने आग्रही असत. वक्तशीरपणा हा त्यांच्या व्यक्तिमत्वाचा अविभाज्य भाग होता. एखादे काम यशस्वीपणे पूर्ण करण्यासाठी नियोजन, सातत्य, शिस्त आणि लोकांप्रती असलेली बांधिलकी किती महत्वाची असते, हे अजितदादांकडून शिकण्यासारखे आहे. त्यांचे विचार, कार्यशैली आणि जनहिताची तळमळ अनेकांसाठी कायम प्रेरणादायी राहील. अशा अभ्यासू, दूरदृष्टी असलेल्या आणि कर्तव्यनिष्ठ नेतृत्वाला भावपूर्ण आदरांजली. त्यांच्या आठवणी आणि कार्याचा आदर्श पुढील अनेक पिढ्यांना प्रेरणा देत राहील, असेही त्या म्हणाल्या.
सुकटे, उपजिल्हाधिकारी प्रतिभा निवासी उपजिल्हाधिकारी मच्छिंद्र वराळे, आरती देसाई, शारदा पोवार, बालाजी शेवाळे, जिल्हा पुरवठा अधिकारी विजय सहारे, जिल्हा माहिती अधिकारी मुकुंद चिलवंत, तहसीलदार चैताली सावंत तसेच विविध विभागांचे प्रमुख उपस्थित होते.