📢 दाभोळे बौद्धवाडीत स्मशानभूमीची बिकट अवस्था; मनसेने दिला आंदोलनाचा इशारा

देवगड : देवगड तालुक्यातील दाभोळे गावातील बौद्धवाडी स्मशानभूमीची दूरावस्था कायम असून गेल्या दोन वर्षांपासून सातत्याने पाठपुरावा करूनही आवश्यक सुविधा उपलब्ध झालेल्या नसल्याचा आरोप महाराष्ट्र नवनिर्माण सेनेचे देवगड तालुकाध्यक्ष संतोष गोपाळ मयेकर यांनी केला आहे. प्रशासनाने १५ ऑगस्टपूर्वी स्मशानभूमीतील मूलभूत समस्या सोडवल्या नाहीत, तर ग्रामपंचायत दाभोळे कार्यालयासमोर एकदिवसीय लाक्षणिक उपोषण आंदोलन छेडण्यात येईल, असा इशारा त्यांनी दिला आहे.

मयेकर यांनी दिलेल्या निवेदनात म्हटले आहे की, दाभोळे बौद्धवाडी स्मशानभूमी अद्ययावत करण्यासाठी ग्रामपंचायत आणि पंचायत समितीकडे गेल्या दोन वर्षांपासून सातत्याने पाठपुरावा करण्यात आला आहे. मात्र, आजतागायत कोणतीही ठोस कार्यवाही झालेली नाही. सध्या पावसाळ्याचे दिवस सुरू असल्याने अंत्यसंस्कारावेळी नागरिकांना मोठ्या अडचणींचा सामना करावा लागत आहे. स्मशानभूमीत शेडची सुविधा नसल्याने पावसात अंत्यसंस्कार करणे अत्यंत गैरसोयीचे ठरत आहे. तसेच वीजपुरवठा नसल्यामुळे रात्रीच्या वेळी अंत्यसंस्कार करणेही कठीण बनले आहे.
या सर्व समस्या तातडीने सोडवून स्मशानभूमीत शेड, वीजपुरवठा आणि इतर आवश्यक सुविधा उपलब्ध करून द्याव्यात, अशी मागणी मयेकर यांनी केली आहे. अन्यथा १५ ऑगस्टपूर्वी प्रशासनाने सकारात्मक पावले उचलली नाहीत, तर ग्रामपंचायत दाभोळे कार्यालयासमोर एकदिवसीय लाक्षणिक उपोषण आंदोलन करण्यात येईल, असा इशारा त्यांनी प्रशासनाला दिला आहे.

Related Posts