🌪️ वादळी वाऱ्याने उडवली घरांची छप्परे; चेंदवणमध्ये थरारक घटना

कुडाळ : कुडाळ तालुक्यातील चेंदवण गावातील टेंबवाडी येथे रविवारी झालेल्या वादळी वाऱ्यासह मुसळधार पावसाने मोठे नुकसान झाले. या नैसर्गिक आपत्तीत विजय मेस्त्री, गिरीजा मेस्त्री आणि गणपत मेस्त्री यांच्या घरांवर भलामोठा वृक्ष कोसळल्याने लाखो रुपयांचे नुकसान झाले. सुदैवाने या दुर्घटनेत कोणतीही जीवितहानी झाली नाही.

वादळामुळे विजय मेस्त्री यांचे देवघर पूर्णपणे जमीनदोस्त झाले, तर गिरीजा मेस्त्री आणि गणपत मेस्त्री यांच्या राहत्या घरांचे छप्पर उडून गेले. घरांच्या भिंतींनाही मोठे तडे गेल्याने कुटुंबांवर मोठे संकट ओढवले आहे.

घटनेची माहिती मिळताच नेरूर मतदारसंघाचे जिल्हा परिषद सदस्य रुपेश पावसकर यांनी तातडीने घटनास्थळी भेट देऊन नुकसानीची पाहणी केली. त्यांनी पीडित कुटुंबीयांना धीर देत संबंधित तलाठी व आपत्कालीन व्यवस्थापन विभागाच्या अधिकाऱ्यांना तात्काळ पंचनामा करण्याचे तसेच बाधितांना शासकीय मदत मिळवून देण्यासाठी आवश्यक कार्यवाही करण्याचे निर्देश दिले. या नुकसानीबाबत जिल्हाधिकाऱ्यांशीही चर्चा करून तातडीने मदत मिळवून देण्यासाठी पाठपुरावा करणार असल्याचे त्यांनी सांगितले.

यावेळी बाळू कोचरेकर, मंगेश बांदेकर, चेंदवणचे ग्रामसेवक तसेच स्थानिक ग्रामस्थ मोठ्या संख्येने उपस्थित होते. दरम्यान, मेस्त्री कुटुंबांना त्वरित आर्थिक मदत देण्याची मागणी ग्रामस्थांनी प्रशासनाकडे केली आहे.

Related Posts